A semana de cine de Lugo celebra 45 anos cunha homenaxe aos irmáns Coira

A semana de cine de Lugo, o evento dedicado á sétima arte máis importante que acolle anualmente a cidade, inaugurou esta segunda feira a súa 45º edición. A organización, a cargo do Grupo Fonmiñá en colaboración coa Deputación Provincial, Concello de Lugo, Xunta da Galiza e a UNED de Lugo (que ocupará o lugar que deixou a USC), homenaxeará, neste ano tan especial, aos cineastas rabadenses Pepe e Jorge Coira. O evento permitirá o visionado de 135 películas que, ademais dunha sección oficial a concurso, contará ademais con documentais, un apartado de curtametraxes, unha sección infantil e outra dedicada a Portugal. A liña desta edición mantén o camiño andado desde os seus inicios. O director da iniciativa, Manuel Curiel, asegura a Nós Diario que "o núcleo da semana seguen a ser as proxeccións nas distintas salas, neste caso 135 en total". A selección, explica o responsábel do acontecemento, partiu dunha convocatoria xeral realizada en novembro "en contacto con dúas plataformas de internet ademais de distintas produtoras e distribuidoras de todo o Estado español" que achegou 2.850 obras. Os irmáns Coira, protagonistas Como cada ano, a actividade máis importante é a homenaxe a algunha figura relacionada co cinema galego. Nesta ocasión, o recoñecemento recae en Pepe e Jorge Coira, que engadirán a súa placa o Paseo do Cine situado no parque de Frigsa da cidade amurallada. Ademais, proxectarase unha retrospectiva dos seus filmes na que se poderán ver obras como Eloxio da distancia (2008), Eroski Paraíso (2019) ou Código emperador (2022), protagonizada esta última polo actor galego Luis Tosar. Curiel amósase satisfeito do éxito profesional de ambos os dous e de "telos outra vez aquí, coa gravación dunha serie para unha plataforma dixital, despois de que pasaran tempo fóra". Hoxe, coa presentación dun libro sobre a súa traxectoria (Delegación territorial da Xunta, 18 horas) e o sábado coa colocación das placas (13 horas), desde a organización, agardan que sexa, en definitiva, "o seu día grande na Semana de Cine de Lugo". As curtas '11.20 A.M.', 'Raticide', 'One Minute' e 'Papirola' triunfan no FIC de Verín Sección oficial A sección oficial comezou onte no auditorio municipal Gustavo Freire coa proxección de The quiet girl (Colm Bairéad, Eire, 2022) e continuará todos os días ás 22 horas até o sábado cos filmes El caftán azul (Maryam Touzani, Marrocos, 2022), El acontecimiento (Audrey Diwan, Francia, 2022), Empieza el baile (Marina Seresesky, Arxentina, 2023), Hasta que el amor nos separe (Ran Li, China e República Checa, 2022) e Cuando la alondra canta (Ana Bilic, Austria, 2023). A sección oficial de curtametraxes, previa diariamente á de longametraxes, tamén comezou onte coa proxección de Tectónica de placas (Miguel Casaseca e Clara Coira, Galiza, 2022). Continuará desde hoxe, e até o sábado, con Tap tap (François Le Guen, Francia, 2022), 7 dosis de dopamina (Virginia Rodríguez, España, 2022), Robots (César Tormo, España, 2022), Solidarity day (Gariel Lugigo, España, 2022) e Calxophobia (Dave Lojek, Alemaña, 2022). A vangarda audivisual cítase en Curtocircuíto Cine galego e portugués O cine galego poderá verse no Vello cárcere con até 40 películas, con títulos como Os vestixios (Melania Cruz, 2022), Morte e o meu avó (Gon Caride, 2023), Morriña (Pablo Maeiro, 2023), Mariví na pel da memoria (Coral e Laura Piñeiro, 2022) ou A rabia (Alberto Díaz), protagonizada por Xosé Antonio Touriñán e Antonio Durán 'Morris'. A representación portuguesa en Lugo, pola súa parte, contará, entre outras, con obras como Já nada sei (Luis Diogo), O amor é auga que corre (Claudia Pineda Mesquida, 2023) e Água nas gelras (Marco Schiavon, 2022). Caricatura e fotografía Como parte das actividades complementarias desta edición, a organización inaugurou a pasada sexta feira unha exposición do caricaturista Gogue no salón das columnas do Círculo das Artes e en diversos locais do centro histórico de Lugo. A mostra, coordinada pola Asociación Lugo Monumental, conta con 20 deseños e estará á venda, destinándose os beneficios da Asociación de Pais ou Titores de Persoas con Discapacidade Intelectual (Aspnais) de Lugo. As obras están relacionadas co mundo do cinema e representan retratos de artistas como Liza Minelli, Marilyn Monroe, Clint Eastwood ou Jack Nicholson. Tamén reproducen personaxes coñecidos da gran pantalla como Morticia Addams, o Capitán Barbosa, Batman, King Kong ou o Joker. Ademais, o Grupo Fonmiñá, continuando coa iniciativa iniciada en 2019 de recoñecer o traballo de fotógrafas e fotógrafos, entregará o seu Trofeo este ano a Anxo Arias Prado, de Foto Oliver, en Viveiro (A Mariña). Anxo aprendeu na Coruña para posteriormente, en 1981, instalarse en Viveiro, onde desenvolveu a súa actividade até 2018 en que se xubilou. O seu arquivo fotográfico consérvase no Seminario de Estudos Terra de Viveiro. Os outros Oppenheimer Fonmiñá ou a devoción pola imaxe na cidade de Lugo Adifusión da fotografía e do cinema en Lugo non se podería entender sen o Grupo Fotocinematográfico Fonmiñá. Naceu en 1978, froito da fusión da Asociación Fotográfica Lucense. Un ano despois nacía a primeira semana de cinema. Desde o inicio estivo dirixida por Manuel Curiel (Fonsagrada, 1948) e a idea foi moi ben acollida. "Tentamos sacar o cine adiante en Lugo, dunha maneira ou outra", asegura Curiel, "mesmo con dificultades de todo tipo, como foros os anos de pandemia", engade. Entre as preocupacións sempre estivo promocionar o cine do país. "Esta edición, por exemplo, proxectaremos case toda a produción galega dos dosu últimos anos", asegura a Nós Diario. Sobre o momento actual do cinema, Curiel non ten queixa da infraestrutura que teñen en Lugo e observa como as necesidades son outras. "Debemos ter agora mesmo unhas quince pantallas, non é problema de falta de salas, o que hai que conseguir é que veña o público a elas", considera. Neste sentido, lembra que non é un problema só que acontece na Galiza, "é xeral, o cine perdeu un millón de espectadoras e espectadores no Estado español en 2022 polo que deberiamos remedialo dalgunha maneira que queremos que teña futuro".