Rosalía dialoga coas distintas linguas do mundo

Padrón é berce do Camiño de Santiago e pedra angular do discurso rosaliano: un lugar exemplar para proxectar a dimensión internacional da cultura galega. E por iso a vila acolle hoxe a inauguración do programa Rosalía en camiño. Diálogos literarios multilingües, unhas xornadas que dispoñen accións poéticas en escenarios xacobeos e rosalianos: unha forma de mostrarse ante o mundo, de iniciar un diálogo cos outros sen renunciar á identidade. A cuarta edición destes encontros escolle como interlocutores Xuan Bello (Paniceiros, Tineo, Asturias, 1965), Sara Plaza (Bustarviejo, Madrid, 1972), Miriam Reyes (Ourense, 1974), Luís López Alonso (Sarria, 1977), Antía Otero (A Estrada, 1982) e Jesús Castro Yáñez (A Pastoriza, 1992), que recitarán as súas obras hoxe na Casa de Rosalía (20 horas), mañá no Museo do Pobo Galego de Santiago de Compostela (19 horas) e o sábado no Panóptico do Vello Cárcere de Lugo (12 horas). Ademais, as xornadas contemplan roteiros por lugares rosalianos da Terra de Iria (hoxe ás 11 horas) e de Compostela (mañá ás 10.30 horas), ambos guiados polo escritor Manuel Lorenzo Baleirón, e polo Lugo literario (o sábado ás 17 horas) guiado pola poeta e xornalista Nieves Neira. "Desde a Casa de Rosalía levamos xa uns anos, dentro das nosas posibilidades, traballando na proxección internacional da figura de Rosalía e da súa Casa", explica Anxo Angueira, presidente da Fundación Rosalía de Castro, en conversa con Nós Diario. "Estas xornadas entran dentro desta liña de traballo: difundir a obra e a vida de Rosalía a través deste diálogo entre poetas galegos e doutras linguas". Nas tres edicións anteriores de Rosalía en camiño pasaron pola Casa da Matanza poetas que escriben en catalán, euskera, portugués, asturiano, castelán, árabe, francés... Mais Angueira non se conforma e anuncia que "temos a expectativa de organizar máis actividades que vaian nesta dirección de internacionalizar a obra de Rosalía". Breamo, novo punto do mapa rosaliano Camiño de ida e volta Con cada unha das edicións de Rosalía en camiño, a fundación edita un libro que contén unha antoloxía de cada un dos autores invitados, xunto cun poema orixinal escrito en diálogo con algún outro poema da autora. "Queremos que este sexa un camiño de ida e volta, que esa interacción non se circunscriba á presenza física e que quede algunha pegada literaria nas linguas das persoas invitadas", declara Angueira. "Cremos que é importante que permaneza esa lembranza do intercambio humano e literario que se dá durante estes días de encontro". A poeta Chus Pato, coordinadora do encontro, subliña esa faceta de Rosalía en camiño: "Non é un festival, aínda que moitas actividades estean abertas ao público; é unha convivencia na que o intercambio de ideas é tan importante como a cara máis pública dos recitais e dos roteiros", sinala a Nós Diario. Chus Pato escribe unha 'Carta aberta a Europa' En lingua asturiana Resulta inevitábel preguntar pola presenza do poeta Xuan Bello, escritor en lingua asturiana, nun ano que foi pródigo en noticias sobre a posíbel oficialización desta lingua e do debate público que esta está xerando. "Non é a primeira vez que traemos un poeta en lingua asturiana, como tamén trouxemos poetas que escriben no galego asturiano, como Belén Rico Prieto, da Veiga", responde Angueira. "Nós abrímonos a todas as linguas do mundo, estamos moi orgullosos de que arredor da figura de Rosalía se abra este diálogo multilingüe. E, especialmente, sentímonos moi próximos a todas aquelas que loitan pola súa supervivencia e dignificación". Chus Pato reforza a resposta de Angueira pondo o foco na selección de autoras. "Rosalía en camiño fala dun diálogo multilingüe, mais hai que ter en conta que as linguas teñen as súas extensións, existen certas fronteiras que se crean e que non son políticas, e nós quixemos exploralas", apunta. "Miriam Reyes, por exemplo, é unha poeta de Ourense que emigrou coa súa familia, cando só tiña oito anos, a Venezuela. A súa obra desenvólvese en castelán, pero o seu vínculo coa Galiza e coa lingua é tan forte que escribiu un poemario en galego, Sardiña (Chan da Pólvora). Ou Sara Plaza, que naceu en Bustarviejo, unha vila de Madrid, e que entrou en contacto co galego a través da poesía. Foi estudando e coñecendo a cultura galega e, finalmente, decidiu instalarse en Lugo e elixiu o galego como a súa lingua literaria para o seu debut na poesía (Todos os pasos fan ruído, Espiral Maior). Queremos internarnos e indagar en todos eses cruzamentos lingüísticos que se dan por causa da emigración ou por outros motivos". Máis de 45.000 'Caldos de Gloria' para Rosalía Redes de colaboración Para Chus Pato, unha das cousas interesantes de Rosalía en Camiño é que "imos creando redes de colaboración e intercambio nas que as persoas se van integrando case sen querer. Nieves Neira foi invitada na edición do ano pasado e este ano creou o itinerario polo Lugo literario. Ou Andrés Currás que, malia que é arqueólogo, foi sumándose a estas xornadas como afeccionado á fotografía e xa o consideramos o fotógrafo oficial do evento", di con humor.