Conectar cos públicos coa mirada posta no futuro, obxectivo do novo Culturgal: así será a edición deste ano

A edición deste ano de Culturgal pasa a denominarse Feira das Culturas Galegas. Un plural que quere reflectir a variedade e a diversidade do sistema e da oferta cultural do país. Como subliñou o director da feira, Camilo Franco, "as culturas precisan públicos e Culturgal quere loitar por eles". Se cadra, esa é a maior novidade dunha feira que ten unha dupla natureza: encontro de profesionais e escaparate de cara ao público. A dirección de Franco inclina o peso cara á confluencia entre os diferentes públicos e as persoas creadoras. O salón de actos do Pazo da Cultura de Pontevedra acolleu este 16 de novembro a presentación da 16ª edición de Culturgal, que vai ter lugar do 1 ao 3 de decembro. No acto estiveron presentes, ademais do propio Camilo Franco, o presidente de Culturgal, Víctor López; a deputada de Cultura da Deputación da Coruña, Natividad González; o director da Axencia Galega das Industrias Culturais (Agadi), Jacobo Sutil; a vicepresidenta da Deputación de Pontevedra, Marta Fernández Tapias; e o concelleiro de Cultura do Concello de Pontevedra, Demetrio Gómez. Camilo Franco, novo director de Culturgal Máis de cen actividades A programación xeral de Culturgal 2023 aglutina máis de 100 actividades nas que o espazo do Pazo da Cultura adquire unha importancia maior, ás que cómpre sumar máis doutra centena de propostas organizadas polas entidades expositoras. A Feira das Culturas Galegas contará en 2023 con cinco escenarios: Literatura, Música, Escénicas, Infantil e Arte. Por eles veremos desfilar propostas do máis variado (recitais, avances, proxeccións, obradoiros, presentacións, concertos…) que inclúen nomes como Leilía, Bernardo Atxaga, Paula Carballeira, Yolanda Castaño, Jaione Camborda, a Orquestra Galega de Liberación ou Leilía, cuxo concerto de despedida preséntase como un dos pratos fortes do evento. Ademais, terá oco para as propostas que saen dos marcos con xéneros mestizos. Neste sentido, presentarase o podcast 13 Avisos. Historias para escoitar á noite, dirixido por Paula Carballeira, e haberá ocasión de presenciar o encontro das poéticas de Iria Piñeiro e Mónica de Nut en Kennebec. No recinto tamén haberá unha área de videoxogos con competicións de producións galegas e unha exposición dedicada a repasar a historia do videoxogo na Galiza. A poesía e o cómic serán dúas das disciplinas ás que Culturgal quere dedicar un gran peso. Dentro da primeira, os diversos recitais que o público poderá atopar no recinto reunirán voces como as de Helena de Carlos, Yolanda Castaño, María Lado, Oriana Méndez, Marga Tojo, Samuel L. París ou Dores Tembrás. Pola súa parte, o ciclo Ilustrando levará ao Pazo da Cultura, para debuxar en vivo, un amplo abano de profesionais da banda deseñada galega, como Kiko da Silva, Fran Bueno, María Bren, Edi García, Miguel Robledo ou Laura Romero. A despedida das 'vidas cantadas' de Leilía Mirada ao futuro Outra das novidades que o director de Culturgal quere implementar é a mirada cara ao que vai vir, ao que lle espera ao público para a tempada que vén. Nas súas propias palabras, "Culturgal debería ser un adianto do que vai suceder nun futuro inmediato. Que as persoas que asistan saian cunha idea de que libros van publicarse, que filmes van estrearse ou que grupos sairán de xira para presentar un novo disco". Así, o público poderá achegarse ás producións que chegarán en 2024 á pantalla e aos escenarios. Proxectaranse avances de seis obras cinematográficas que se estrearán o ano que vén -Patarinos (Sétima), As Neves (Cósmica Producións), Da túa man para a miña (Miramemira), Aurora (Gaita Filmes), La Parra (Filmika Galaika) e Cine Paraíso, Leiro (Noveolas Producciones)- ademais das exhibicións doutros filmes como Honeymoon, O corno ou Matria. O Centro Coreográfico Galego e o Centro Dramático Galego presentarán a súa programación para o vindeiro ano, que no caso deste último incluirá a celebración do seu cuadraxésimo aniversario. Por outro lado, as galerías e institucións artísticas que participan este ano no Espazo Arte representan modos de traballo novidosos e de relacións entre a arte e a sociedade existentes no contexto galego, mais tamén con certa vontade de transcendelos. Desde cadansúa ollada particular, estes proxectos realizarán un programa de actividades que incluirán performance, intervencións e obradoiros con diferentes artistas do país. Entre os postos atoparanse, por exemplo, Solaina (Lugo), Patio de Luz (Santiago de Compostela) ou La Doce (Boiro). Cita coa arte contemporánea en Aberto 2023 Espazo para a infancia Culturgal continúa a ser un espazo de referencia para asistir en familia. A programación mantén o peso das actividades para público infantil durante todas as xornadas con teatro, cinema, animación, obradoiros e lecturas dramatizadas. Haberá tamén diversos contacontos, que incluirán, por exemplo, ilustración en directo (Olalla González) ou música (A Fraga de Pasacorrendo). Igualmente, este ano a Feira das Culturas Galegas terá un espazo de coidado de crianzas para que poidan xogar e divertirse conxuntamente. Tamén haberá un aparcadoiro de carriños, para que as familias poidan moverse con máis facilidade polo recinto. Paula Carballeira: "O teatro é o grande espazo da liberdade de expresión; a proba é que foi o primeiro que censuraron" Culturgal Expandido Expandir a feira no tempo e no espazo é outro dos obxectivos do novo director. E este ano, por primeira vez, Culturgal terá dúas sedes. A feira converte Pontevedra en epicentro da actividade cultural do país, pero apela toda a Galiza. A organización do evento e máis a Deputación de Pontevedra anunciaban este 13 de novembro a programación de Culturgal Expandido, que se desenvolverá na sede viguesa da institución provincial entre os días 23 e 24 de novembro. Sen dúbida, a actividade máis esperada neste Culturgal Expandido é a celebración do 40º aniversario dos Premios Xerais, que reunirá nomes que recibiron este recoñecemento ao longo dos anos como Rexina Vega, María Reimóndez, Manuel Esteban, Santiago Lopo e Pedro Feijoo. Completarán o programa outras actividades como un espazo de debate sobre memoria histórica coa escritora Iria Morgade e a historiadora Alba Garrido; unha lectura-concerto coa escritora Iolanda Zúñiga e o pianista Velpister; ou un concerto de Catuxa Salom, entre outras.