As acrobacias e danzas aéreas, os saltos mortais e o manexo de até catro diábolos á vez foron os trucos máis aplaudidos e vitoreados esta cuarta feira no Multiusos Fontes do Sar de Santiago de Compostela, onde o Cirque du Soleil, ou Circo do Sol, realizou o primeiro pase do seu espectáculo 'Ovo', unha inocente e divertida historia de amor entre unha xoaniña e unha mosca azul.
A música en directo puxo o broche de ouro a este relato desenfadado que a compañía canadense representou durante 100 minutos —separados en dúas metades a través dun receso de 25— ante miles de persoas na pista onde disputa os seus partidos o Obradoiro. Este elegante espectáculo é un popurrí de cores e artes circenses que ten un ovo —cunha clara inspiración brasileira— como elemento central.
As longas colas do público asistente a este primeiro pase do Cirque du Soleil do ano 2024 foron bastante áxiles e non impediron que xa dentro, no 'hall' do Multiusos, numerosos grupos tivesen tempo de pararse nos mostradores para facerse con flocos de millo, bebidas e, mesmo, elementos de 'merchandising'.
Cores, luces e música
Antes de arrincar a sesión, case ás 20.40 horas da tarde, un ovo xigante ocupaba todo o escenario mentres unha voz 'en off' daba unhas instrucións previas como a de non usar o flash para non distraer os artistas e acróbatas. Nada máis empezou a soar a música, o ovo abriuse para dar paso a un xogo de luces e música en directo que precedeu á presentación en pista dos 52 artistas que compoñen 'Ovo'. Entre eles e os técnicos, a compañía precisa a uns cen persoas para transportar este espectáculo por todo o mundo.
Alturas, teas colgantes, caídas de infarto a uns colchóns e danzas aéreas fixéronse cos máis longos e soados aplausos dunha noite na que tamén tiveron cabida o contorsionismo e os malabares con até catro diábolos que rozaron o teito.
'Ovo' alterna as acrobacias dos especialistas cun teatro musical divertido, apto para todo tipo de públicos, tamén os máis pequenos, que conta como unha mosca azul namora dunha xoaniña —ambos os dous interpretados por pallasos— e tenta conquistala. Mentres tanto, un escaravello, xefe do ecosistema de insectos, emprende todo tipo de tretas para facerse co ovo traído pola mosca.
Os diálogos entre os personaxes son nunha lingua inventada que se fai lexible grazas a unha inxenua interpretación. Tamén houbo tempo para sacar ao escenario unha muller e un home do público que non dubidaron en entregarse ao 'show' para desatar as risas e o aplauso de todos os asistentes.
A guinda deste pastel puxérona os 13 grilos e unha araña vermella que fixeron mortais, escalada e saltos de colchón nunha parede mentres soaban os últimos acordes desta mostra que acabou, como non podería ser doutra maneira, con confeti e efectos visuais.
O desta cuarta feira foi o primeiro do oito pases de 'Ovo' que fará o Cirque du Soleil até o domingo, Día de Reis, en Santiago de Compostela. Posteriormente, dirixirase a Zaragoza. A compañía canadense chegaba esta segunda feira, 1 de xaneiro, á capital galega a bordo de 23 camións chegados desde Lisboa, onde permaneceron os últimos días do 2023.
