Décimo aniversario: a cantora MJ Pérez estrea novo sinxelo, 'Barco á deriva', e a xira 'X+I'

A cantautora MJ Pérez comezou este ano pisando forte. A arzuá vén de sacar o seu novo sinxelo, Barco á deriva, co que dá inicio á súa nova xira, X+I, unha aposta moi especial coa que celebra o décimo aniversario da súa carreira musical. “Empecei forte porque para que saiban que estás aí e para que che escoiten hai que facer moito ruído”, explica a cantante a Nós Diario. Con Barco á deriva MJ volve musicalmente ás súas orixes, o pop-rock. "Faime recordar os inicios, pero hai unha progresión enorme", destaca a artista sobre o seu traballo. A composición conta cun aire totalmente renovado, froito da experiencia dunha década de traxectoria. "Hai unha madurez, unha bagaxe e sobre todo unha aprendizaxe, froito de sorrisos, pero tamén de moitas lágrimas", indica a arzuá. A canción é un bucle, tanto a nivel musical como de concepto, repítese o mesmo constantemente ao longo do tema. É tan completo como cíclico, comeza como acaba. Barco á deriva é unha queixa, MJ quere reflectir a situación dunha xeración, a súa, que traballa e loita por saír adiante e por atopar o seu lugar no mundo. “Por que é tan difícil para nós facer unha vida propia?”, pregúntase a cantautora. Co paso dos anos é cada vez máis difícil labrar un futuro, a pesar do esforzo. Na precariedade, o tempo avanza sen opcións, e como di a canción, parece que "nada cambiará". Pero, a pesar do aparente negativismo, Barco á deriva é un berro da artista, unha reivindicación e unha posta en valor de que, pese á frustración e á incerteza, segue adiante con todo. MJ Pérez: "O noso sector musical ten que tomar conciencia da diversidade que hai e ampliar o abano" Contra a precariedade “A nivel artístico así é como me viña sentindo desde 2020 para aquí, como nun barco á deriva. Pa onde vou?”, reflexiona. O mundo cultural, e particularmente o musical, sempre foi difícil, pero nos últimos tempos está sendo aínda máis complicado. A música está en continua efervescencia, "estamos abrindo a porta a certos estilos e modas, pero féchase a porta a moitas outras cousas", sostén. Bota en falta que haxa mentalidade aberta e variedade, o non caer en carteis repetidos ou tirar sempre por un só xénero. Isto deixa de lado un dos puntos fortes da música galega, que é que hai moita variedade de grupos e de estilos. A Ribeira Sacra como escenario O videoclip de Barco á deriva, foi producido pola propia cantautora e dirixido por ela, xunto con Iago Vilarinho e Gustavo Dieste. Está integramente rodado na Ribeira Sacra, “foi un acerto gravar alí porque a paisaxe fala moito de por si”, explica MJ. Neste tema, o visual acompaña o musical, dáselle significado a cada plano, complementando a letra. “A canción é unha viaxe, e se a escoitas canda o videoclip transmite moito máis”, destaca a artista. MJ Pérez aparece como protagonista do vídeo, primeiro perdida entre a natureza, despois soa a bordo dun pequeno bote na inmensidade do río Miño, representando a soidade. É unha paisaxe de paz pero ao mesmo tempo transmite a sensación de estar perdida, sen rumbo, nun barco á deriva. A autora quixo plasmar ese desasosego, “na Galiza temos moitos lugares que transmiten moito, hai que saber escoitar coa mirada”, indica. A esperanza no futuro ilumina o canto guerrilleiro de MJ Pérez Unha xira para celebrar unha década na música MJ presentou o sinxelo o mes pasado en Chantada, comarca na que se rodou o videoclip. A cantante explica que tivo moi boa acollida, “moita xente emocionouse tanto coma nós". Ademais, con isto deu inicio a X+I, Xira de 10º aniversario, que recuperará os temas máis destacados da artista. As actuacións arrincarán con Correría o risco, a petición dos seus seguidores, xa que facía tempo que non a cantaba en directo, e non poden faltar cancións como Ai de min, Guerrilleira ou a última, obviamente, Barco á deriva. A artista describe estas actuacións como unha mestura de estilos, que van desde cancións máis "cañeiras" como A peza solta a outras máis acústicas, incluso acompañadas de ukelele, como é o caso de Ora aperta, amor. "É difícil de explicar, a xente que veña e que o escoite", indica a artista. A rolda de concertos arrancou cunha actuación da cantante o pasado 26 de xaneiro en Salga A Fundación, no concello de Melide, e a artista vén de tocar tamén en Santiago de Compostela, na Gentalha do Pichel. MJ actuará o 23 de febreiro en Lugo, o resto de datas da xira aínda están por confirmar. Até o de agora a arzuá conta cun total de catro álbums: Ollos que non ven, síntoma de cegueira; así como Guerrilleira, Casandra e A Luz Prendida. Está traballando en varios temas no momento, na liña da rumba e os ritmos latinos que a caracterizan na actualidade. Ademais, están no aire futuras colaboracións con outros artistas galegos e portugueses. "Quizais todo acabe derivando nun álbum", indica, mais non confirma nada de momento, o que si deixa claro é que "cousas novas van vir". A música e a comunicación audiovisual van da man Á parte da súa faceta musical, pola que é recoñecida maiormente, MJ Pérez ten outra faceta como produtora. A arzuá estudou Comunicación Audiovisual e ao principio a artista tiña sentimentos encontrados con respecto a esta dualidade, mais co tempo deuse de conta de que "realmente todo está conectado, son mundos que non están tan lonxe". Para a cantora o audiovisual é moi importante, de aí que produza ela mesma todos os seus videoclips, cando non é integramente, está detrás da produción ou a dirección. Isto vese reflectido en cada peza, nótase o traballo que hai detrás de cada plano. Barco á deriva é un bo exemplo disto, a combinación de luces e sombras, a escolla dos lugares, da vestimenta... Outros proxectos Con respecto a esta faceta como comunicadora audiovisual, o ano pasado decidiu emprender un novo proxecto, crear o seu propio podcast, Canto conto, unha serie de conversas con personalidades galegas do seu gremio e doutros ámbitos, como futbolistas ou escritores, coa finalidade de mostrar a "cara mala" das súas profesións para que a xente vexa tamén o que hai detrás. Este ano comezou forte no ámbito da música, mais Canto conto continuará activo, con novos invitados.