Artistas novas para as ideas do futuro

Igual que se vén facendo desde mediados do século XIX, o destino das bolsas para ampliar estudos artísticos que outorga a Deputación de Pontevedra permitirán ás persoas premiadas continuar cos seus procesos de investigación e creación, desenvolver as súas teses de doutoramento ou ampliar a formación cursando algún mestrado. Antía Iglesias, Sandra Barreiro Parguiña, Andrés Sanjurjo e Lucía Perdiz son as gañadoras do certame de Artes Plásticas Novos Valores, que pretende impulsar os e as artistas galegos e galegas ou que residan na Galiza. Ao certame preséntanse obras orixinais non premiadas en anteriores edicións, que aspiran a gañar unha das catro bolsas de 7.500 euros para ampliación de estudos. Na edición de 2023 presentáronse cincuenta obras, entre as que o xurado seleccionou vinte creacións con técnicas diversas: fotografía, pintura, escultura, pezas de costura, vídeo creación, debuxo, instalacións e varias obras con técnica mixta. Estas son as que se mostran na exposición aberta no Edificio Sarmiento, dedicado ás novas xeracións de creadores e creadoras, boa parte delas realizadas por egresadas, egresados e estudantes da Facultade de Belas Artes de Pontevedra, que poderá visitarse até o vindeiro 24 de febreiro. Desta vintena de obras, o xurado -integrado polo director do Museo de Pontevedra, Xosé Manuel Rey como presidente; a profesora de Belas Artes María Covadonga Barreiro; o xornalista cultural e crítico de arte Ramón Rozas; a directora da colección de arte da Fundación María José Jove, Susana González; a artista e doutora en Belas Artes Carmen Nogueira e a conservadora de fondos xerais do Museo, Beatriz de San Ildefonso- seleccionou como gañadoras destas bolsas de estudos as creacións pictóricas sobre pano 1851-1888-1900, de Sandra Barreiro Parguiña; a peza escultórica Percorrer, atravesar, andar..., de Lucía Perdiz; a instalación Estados intermedios. Estados residuais, de Antía Iglesias, e o videoensaio Canto custa unha imaxe?, de Andrés Sanjurjo. O ornamento como arma política na pintura de Almudena Fernández Heteroxeneidade estética e preocupacións sociais Pode ser unha boa oportunidade para saber que é o que teñen as artistas novas na cabeza, cales son as inquietudes que se expresan a través da súas obras. A exposición Novos Valores 2023, que se pode ver no Edificio Sarmiento do Museo de Pontevedra ofrece pistas sobre como interpretan a realidade as xeracións máis novas. Aínda que as súas formas de expresión son moi diferentes entre si e non existe un discurso curatorial máis alá da selección realizada en virtude do interese das obras, a maioría dos participantes ten en común o seu interese por cuestións que afectan o panorama social, político e cultural. Sandra Barreiro Parguiña desenvolve una investigación sobre a figura do pano na súa tese de doutoramento e, no marco destas pescudas, xurdiu a serie pola que resultou premiada neste certame. Nela rescata tres das emblemáticas exposicións universais que tiveron lugar na segunda metade do século XIX -as de 1851, 1888 e 1900 en Londres, Barcelona e París- para explorar o imaxinario de progreso técnico e artístico que reflectían en tres deseños impresos en seda, nos que o pano é entendido como un lenzo, no que se plasman ilustracións previamente realizadas con acuarela, tinta chinesa e acrílicos. O traballo artístico de Lucía Perdiz xira arredor do concepto de mobilidade e territorio, ás ideas de traslado e movemento que implican conceptos como o de estrada, o de fronteira ou o de marxe. A obra premiada, Percorrer, atravesar, andar..., afonda nesas mesmas ideas a través da acumulación de obxectos domésticos que reflicten o rastro do tempo e que aluden directamente a urxencia e necesidade de desprazarse, e que remite á linguaxe do urxente, o transitorio e o inestábel, propia dos espazos de transito e mobilidade. Pola súa parte, Antía Iglesias, integrante do grupo de investigación dx5, da Facultade de Belas Artes, afonda nas relacións entre arte e ciencia. A obra pola que recibiu o recoñecemento do certame Novos Valores mostra un estado temporal dun proceso de secado de pigmentos extraídos de especies vexetais, cos que construíu unha instalación que procura explotar o potencial poético e artístico da investigación científica. Andrés Sanjurjo, finalmente, desenvolve unha obra audiovisual que se relaciona coa observación da paisaxe e a comunidade e que ten moitas referencias ao íntimo, ao persoal. O ensaio explora ese terreo entre o biográfico e a mirada do distante para discernir onde reside o valor da imaxe resultante do traballo da creación. Dupla exposición para celebrar o trixésimo aniversario do CGAC Ruth Vidal destaca en Ourense Tamén a Deputación Provincial de Ourense vén de recoñecer os novos artistas coa resolución da decimo oitava edición do seu certame internacional de artes plásticas para novas e novos creadores. A arousá Ruth Vidal Suárez resultou premiada coa súa obra Lugar de lugares, un traballo que reflexiona sobre a paisaxe, tanto natural como artificial. A partir de setembro, unha exposición no Centro Cultural Marcos Valcárcel permitirá ver unha selección dunhas trinta obras de entre as 276 presentadas.