Artesanía, cultura e labranza xúntanse esta fin de semana na Estrada

Produtos da terra, artesanía e cultura. Son as tres patas que promete a cuarta edición da Feira da Labranza que decorrerá esta fin de semana na Estrada, desta volta coas herbas medicinais e aromáticas como elemento central dos festexos. As instalacións da Casa Maruxío, no lugar de Terreboredo, acollerán dúas xornadas repletas de actividades: feira, obradoiros, concertos, comida, música... "E moita diversión!" afirma a Nós Diario María Rivas Couceiro, unha das creadoras –xunto con Uxío Alho García– do proxecto que impulsa esta feira. E é que detrás das Feiras de Labranza que decorren na aldea de Terreboredo está Maruxío Terra e Sal, unha marca que naceu como obradoiro de galletas e acabou converténdose nun plan para expandir a tradición e a cultura no rural. "Esa é realmente a base do noso proxecto. Levar a cultura ao rural e tamén revitalizalo e convivir coa súa xente, así como con outros proxectos. Facer sinerxías con eles e así potenciar as oportunidades que temos no rural", explica María Rivas. E, precisamente, como resultado dese proceso de transformación constante da iniciativa, a presentación da nova marca de Maruxío dará o disparo de saída da cuarta edición da feira. "Nós estamos co cambio do nome de Maruxío. A nova denominación ten relación con todo o que facemos pero, sobre todo, co proxecto novo que imos presentar na cuarta edición da feira, que é o cultivo de aromáticas ", aclara Rivas a Nós Diario. Facer cultura no rural Con esa idea de expandir a cultura no rural naceron hai catro anos as Feiras da Labranza, mais tamén "facer sinerxías, recuperar as tradicións, que a xente se xunte a través da festa, da cultura, da tradición e, como non, coa gastronomía de por medio", afirma María Rivas. Mais estas non son as únicas novidades que nos traerá a IV Feira da Labranza. Celia Pía presentará, tamén na mañá do sábado, a súa obra; Antón Mascato dará a coñecer o cómic Francisco Fernández del Riego. O home que valía por mil (Galaxia) e, na mesma liña, Maruxío desvelará a súa nova caixa de galletas dedicada a don Paco con motivo da celebración do Día das Letras Galegas 2023. Finalmente, terá lugar a presentación da exposición Térreas, a cargo da arquitecta e ilustradora Rosa de Cabanas. A continuación, chegará a primeira actuación musical da man do grupo estradense De Tazas, unha actividade, a musical, que continuará a última hora da tarde co grupo Son da Illa, da Arousa, que amenizará unha foliada. "Nesta edición temos tanto música local como visitante, pero sobre todo local, e xente que virá tocar cos seus instrumentos. Armaremos unha boa festiña", di Rivas. Entremedias, as familias poderán desfrutar dun obradoiro impartido por Yolanda Castro. Baixo o título "Atrapasoños con elementos natureza", pais, nais e crianzas aprenderán a fabricar os seus propios atrapasoños con elementos que atoparán no medio rural. Tamén terán á súa disposición diversos xogos tradicionais e populares. Domingo musical A música centrará as actividades matinais do domingo. Abrirá a xornada a actuación musical de María Corral (voz e percusión), Celia Pía (voz e guitarra), Serodio (ao violín) e Uxío (voz). Ademais actuarán Os Rebolos, grupo musical de Terreboredo, cunha banda convidada: As Lilainas, unha agrupación de mulleres que xurdiu nunha aldea veciña. Tamén pola mañá, Casa Maruxío acollerá a presentación do libro infantil autoeditado Xela, a superheroína de aldea. A súa autora, Inma Soto, asinará exemplares a quen o desexe. Tarde de plantas A idea central do novo proxecto de Maruxío protagonizará as actividades da tarde do domingo. Nun obradoiro de maceracións con plantas e flores as persoas asistentes aprenderán a elaborar os seus propios macerados para diversos usos medicinais e cosméticos. Este curso correrá a cargo de Iria Medraño, da Ervalúa. "Seguindo a temática da feira deste ano, orientada ao medio natural e ás plantas, buscaremos achegar as herbas aromáticas e medicinais ás crianzas con actividades familiares como este taller de maceración ou coa actividade que decorrerá na tarde do sábado", explica Rivas a Nós Diario. A continuación, o Instituto de Herboloxía Sarela, un dos novos colaboradores na etapa que principia Maruxío, guiará unha visita polo Parque de Aromas onde as persoas asistentes coñecerán distintas plantas de interese botánico. A presentación do traballo poético-musical Do Azul de Iria Medraño porá o ramo a esta IV Feira da Labranza, na que tamén haberá, ao longo de ambas as dúas xornadas, feira de artesanía e postos de comida, que completarán o paquete de actividades. "Non poderán faltar, nunha feira de labranza, os produtos do agro de proximidade. Nin tampouco a oferta gastronómica, con sidra da Estrada e cervexa de Lalín. Imos estar moi ben acompañadas e acompañados", sentencia Rivas.