As catro asociacións que se uniron para sumar forza na defensa do conxunto arqueolóxico de Coeses presentan agora diante dos Xulgados de Lugo unha solicitude na que se reclama o cumprimento da Lei de Patrimonio e se respecten os informes preceptivos das escavacións arquelóxicas.
ADEGA, Lugo Patrimonio, Asociación de Amigos do Patrimonio de Castroverde e Cultura do País denuncian que tanto a Xunta como o goberno central anunciaron mesmo sen ter rematadas as escavacións “a súa intencion de arrasar a presunta necrópole dividindo a integridade do conxunto arqueolóxico”.
As catro asociacións diríxense ao Ministerio Fiscal para comunicarlle o perigo que corre o conxunto arqueolóxico de Coeses coas obras do trazado da autovía A-54 Lugo-Santiago e reclamar medidas de protección. No informe que presentan sinálase a excepcionalidade do conxunto arqueolóxico descuberto, anexo ao poboado da Idade de Ferro Castro Valente. Trataríase de dúas necrópoles, unha de inhumación e outra de incineración, a Chousa do Rodeiro ou Chousa do Castro.
“Este achádego foi cualificado polos arqueólogos como excepcional e único no territorio galego, está inicialmente datado na última Idade de Bronce e afirman, aínda con todas as cautelas, que podería ser a necrópole ou cemiterio do castro” explican. Reclámanlle á Fiscalía que faga cumprir a Lei de Patrimonio e que se desenvolvan as investigacións para dirimir as posíbeis responsabilidades penais do Ministerio de Fomento, coa colaboración da Xunta, con respecto á decisión sobre o trazado sen ter en conta os informes preceptivos dunhas escavacións que aínda están en marcha.