De Viveiro a Punta Pardiñas

Desta volta imos percorrer a banda dereita da ría de Viveiro, formada maiormente por cantís graníticos, en contraste coa outra banda que é de xistos. É un litoral en parte ocupado por infraestruturas portuarias, dos portos de Viveiro e de Celeiro, cun importante areal (a praia da Area), rochedos e cantís que nalgúns puntos acadan boa altura nos que podemos ver furnas, penedos de curiosas formas, illotes... No conxunto destaca a presenza do monte Faro, un cume de 194 metros de altura, onde hai un miradoiro que domina esa parte da ría. Paraxe: Mariña Occidental / Concello: Viveiro / Percorrido: 17 km (ida e volta) / Dificultade: Baixa Nalgunhas partes do traxecto non hai accesos, por estar os camiños sen preparar ou por estar o litoral ocupado por propiedades privadas que chegan até a beira do mar. E noutros puntos a presenza dos eucaliptos dificultan as vistas e a circulación. Comezamos na vila de Viveiro e, se é a primeira visita, podemos dar unha volta polo casco histórico para coñecer os principais elementos de interese. Tamén recomendamos subir previamente ao monte de San Roque, de 353 metros de altitude (uns 7 km), unha magnífica atalaia desde a que poderemos gozar dunha incríbel panorámica de Viveiro e a contorna. No monte de San Roque hai unha área de lecer, unha capela dedicada ao Santo (construída no século XVI e restaurada en 1963) e outras referencias (Cova do Santo, as pisadas do cabalo nunha rocha)... e ao seu arredor varias lendas. O día do santo (16 de agosto) celébrase unha tradicional romaría. Desde Viveiro botamos a andar pola beira do litoral e seguimos o paseo que pasa polo porto de Viveiro, pola praia e as instalacións portuarias de Celeiro. Desde o dique podemos ver as puntas do Forno, O Puntal e O Altar. Desde alí subimos pola Atalaia (onde hai unha boa vista de Celeiro) para ir á estrada e seguimos por ela até onde collemos o primeiro desvío á esquerda que vai á praia da Area. No camiño podemos facer un desvío por carreiros de pescadores para ver as puntas do Becerro e da Terra de Pedra, con curiosas formacións nas rochas. Unha vez na praia da Area percorremos o seu quilómetro cumprido até a punta da Arnela, detrás da que se recolle unha fermosa praia, á que se achegan só os que saben dela por un carreiro entre fechamentos. Volvemos á estrada e imos en dirección ao lugar de Faro (tamén se pode coller, na curva, un camiño vello para atallar) e de alí subimos ao miradoiro do monte. Ao baixar imos polo desvío para achegarnos á baliza de Monte Faro e aos cantís. De volta, seguindo o roteiro dos Camiños do Cantábrico, rematamos o percorrido baixando ao coído e á praia de Portonovo e á Insuela (Punta Pardiñas), illote compartido co concello de Xove no que hai interesantes formacións rochosas.