Litoral de Viveiro

A costa de Viveiro atópase toda ela dentro da ría, a unha e outra beira da desembocadura do río Landro. Entre Celeiro e Sacido, está totalmente ocupada por asentamentos humanos e instalacións portuarias, a non ser a praia de Covas, e os tramos restantes están formados por cantís que na banda esquerda da ría, pola natureza das rochas que os forman e a posición dos estratos, son moi recortados e chegan a ter caídas de ata 50 metros, mentres que na banda dereita son de caída máis tendida. Paraxe: Mariña Occidental / Concello: Viveiro / Percorrido: 23 quilómetros (lineal) + camiñadas / Dificultade: Baixa Propoñemos un primeiro achegamento para coñecer os puntos accesíbeis de maior interese, xa que moitos lugares son complicados, pola ocupación humana ou pola dificultade do terreo. Comezamos na praia de Portonovo a onde chegamos polo desvío de terra, sinalizado, que hai na estrada que vai de Faro á praia de Esteiro, en Xove. Volvemos cara a Faro e temos un desvío á dereita que nos leva ao miradoiro do Monte Faro, con panorámicas da ría de Viveiro. De volta na estrada, cruzamos o lugar de Faro e seguimos cara á praia da Area. Desviámonos á Arnela para ter unha panorámica do conxunto da praia da Area e volvemos á estrada para ir ata Auga Dóce desde onde temos unha panorámica desde a outra punta. De Auga Dóce subimos á estrada principal para coller o desvío á Atalaia de Celeiro desde onde temos panorámicas do porto e da parte de dentro da ría. Da Atalaia baixamos ao porto e pola beira imos ata a ponte Maior ou da Misericordia. Despois de cruzala, desviámonos á dereita pola zona deportiva o que nos vai permitir percorrer, por unha rúa dun só sentido, a praia de Covas en toda a súa lonxitude. Ao final do paseo incorporámonos á estrada de novo para seguir ata o Escourido onde nos desviamos á área etnográfica da Ínsua onde está o antigo cargadoiro de mineral, e moi preto a cova coñecida como San Xoan Vello, restos dunha igrexa rupestre. Seguindo pola pista de terra ata o final é onde nos atopamos máis preto dos cantís das puntas da Ínsua e do Cabalo e do acceso á cova da Doncela. De volta en Escourido desviámonos á dereita para achegarnos ao esteiro do rego de Escourido que no seu tramo final, na praia da Abrela, é o límite do concello. E para aproveitar mellor a viaxe tamén podemos subir ao monte de San Roque, que se atopa detrás da vila, unha magnífica atalaia dese a que poderemos gozar dunha incrible panorámica de Viveiro e a contorna.