A partir do dous de xaneiro de 2020 Nós Diario vai encher as rúas de xornalismo galego. O diario en papel publicarase, con trinta e dúas páxinas a cor, desde o día dous de terzas a sábados e no soporte dixital os trescentos e sesenta e cinco días do ano. Sermos Galiza, tamén a trinta e dúas páxinas e a cor, traslada a saída para sábado, acompañando o diario, como suplemento semanal, a partir do día catro de xaneiro. Mudamos de deseño e de contidos para nos situar á vangarda.
Iniciamos así unha nova etapa que non sería posíbel sen todas e cada unha de vós: grupo impulsor que en 2011 percorreu Galiza en busca de apoios; accionistas; subscritoras e subscritores; xornalistas que puxeron as bases do proxecto; colaboradoras e colaboradores; anunciantes… Grazas a todas e todos vós logramos marcar un punto de inflexión en aras dun xornalismo crítico, independente, e sen mordazas que renderá contas perante a honestidade, a verdade e os intereses galegos.
Queremos seguir contando con todas e todos vós para que Nós Diario medre día a día nunha singradura que comezou en 2012 e que ten todo o futuro por diante.
