No outono do 1244
un novo estudoso musulmán de Konya
coñeceu un recén chegado que estivera viaxando
por todo Oriente Medio.
Iste estraño propuxo ao estudoso unha pregunta:
Continúa sendo un dos grandes misterios
Calquera que fose a pregunta,
que o novo estudoso perdeu o alento e desmaiouse.
Cando volveu en si falaron
encadeados nunha corrente de diálogo imparábel.
Inseparábeis, conversaron durante días sen precisar nada humano –
como dous músicos compoñendo, un tralo outro continuando dende
onde o outro o pousara nun estado de descubrimento puro.
Tarde, unha noite, no medio da conversa,
o amigo foi atender unha chamada á porta
e non volveu.
O estudoso novo sumiuse no silencio e xurou non
volver falar ata que o seu amigo tornase.
Descendera ao que se coñece
como o fondo pozo da meditación, estreito
túnel da contemplación mortal.
Durante meses, ningunha palabra abrollou dos seus beizos.
Entón, na súa noite máis escura mirou enriba
e ouviu un alarido salvaxe. E berrou
atopou unha voz nova en formación.
Á mañá seguinte, dirixiuse ata o mercado da praza
e comezou a falar. Poesía e parábolas desbordantes
Ti es o ceo no que o meu espírito xira
A miña alma é doutro lugar. Comezou
a cambalearse e expandirse cos seus brazos acircados
Circunvalando entre as viandas,
tecendo aprendizaxes dos garavanzos; creando fábulas
semellantes a kebabs queimados. Unha morea de xente congregouse
algúns comezaron a extasiarse e disolverse
na risa, outros xemían en éxtase
e choraban. Un home novo comezou a escribir
embaixo cada palabra dita.
O estudante de Koyna perdeu todos os símiles
e transformouse na cousa mesma: o amante, o mendigo,
a terra sedenta, a flor despregada
El continuou xirando nas horas pequenas,
o seu amigo tornando a través del.
Unha lúa muda sorrindo nas alas.
Adam Wyeth vén de publicar About: blank coa editora irlandesa Salmon Poetry. Nesta casa editorial atopamos anteriores poemarios do poeta e dramaturgo inglés residente en Dublín: The Art of Dying, considerado o libro do ano para o Irish Times, e Silent Music. Wyeth e tamén autor do ensaio The Hidden World of Poetry: Unravelling Celtic Mythology in contemporary Irish Poetry e tamén da entrega dramática This Is What Happened.
O poema The Great Friend (O Grande Amigo) relata o encontro histórico na mística sufí entre Rumi e Shams, forma parte do libro About: blank, un salto sen rede ás profundidades do baleiro da composición automática, unha aposta sen cancelas entre xéneros e modos de escrita.
Moi interesado na mitoloxía, Adam Wyeth fixo o Camiño de Santiago convidado pola Fundación Uxío Novoneyra a participar nas segundas residencias itinerantes Ámeto Mítico. Nestas residencias, poetas de distintas linguas e procedencias conviven e comparten a súa poesía e a súa experiencia como peregrinos co alumnado de seis centros educativos de lugares queridos e transitados por Uxío Novoneyra na súa derradeira obra, Ámeto Mítico. Arrodeos e Desvíos do Camiño de Santiago e outras rotas.
