Imprimir

O Hospital de Verín deixa de atender partos e crianzas

Raquel C. Pérez | 25 de novembro de 2019

Manifestación da Platagorma en Defensa da Sanidade Pública da Comarca de Monterrei en febreiro de 2018 (Plataforma en Defensa da Sanidade)
Manifestación da Platagorma en Defensa da Sanidade Pública da Comarca de Monterrei en febreiro de 2018 (Plataforma en Defensa da Sanidade)
A partir do 1 de decembro o servizo de partos do Hospital de Verín derivarase ao de Ourense. A problemática de fondo, denuncian desde a Comisión delegada do Hospital de Verín, é a falta de pediatras que atenda as mulleres e as urxencias das menores de 14 anos. O feche do paritorio, sinalan, é un paso máis no desmantelamento da sanidade na comarca de Monterrei.

O anuncio do traslado do servizo de partos do Hospital de Verín ao de Ourense ten recibido a resposta crítica de profesionais da saúde, veciñanza, sindicatos e forzas políticas. A partir do 1 de decembro, as mulleres da comarca de Monterrei terán que desprazarse en coche para dar a luz. “O problema non é só para as mulleres, senón o feito de que ao non haber pediatras tamén se desviaran as urxencias dos menores de catorce anos a Ourense”, alertan desde a Comisión delegada do Hospital de Verín.

Nunha rolda de prensa a pasada cuarta feira o xerente da área sanitaria de Ourense, Verín e O Barco de Valdeorras, Felix Rubial, explicou que o feche obedece ao baixo número de nacementos na comarca de Monterrei. O pasado ano tiveron lugar 89 e, no que levamos de 2019, 47 mulleres deron a luz, ficando 12 por facelo. “O certo é que en 2018 o paritorio mantívose pechado máis dun mes, e que hai gardas que non se podían cubrir. O marco para atender ás mulleres xestantes era moi ríxido, a pesar de que había profesionais que as podían atender había casos de risco, por exemplo, que eran derivados a Ourense”, denuncia a Comisión.

“A realidade é que o Hospital de Verín depende do servizo de pediatría de Ourense. Os pediatras están realizando gardas localizadas en Verín e despois non dan a basto para atender as necesidades en Ourense”, sinalan. En circunstancias normais unha matrona atende os partos, mais precisa do apoio dunha pediatra para atender á recen nacida.

Esta segunda feira manttívose unha reunión coas mulleres afectadas polo traslado do servizo, aquelas cuxo parto está previsto para o mes de decembro, para explicarlles situación. “O xerente asegurou que se mantería a asistencia pre e posnatal ás mulleres”, explican desde a Comisión. Mais isto non impedirá que teñan que realizar traslados de máis de setenta quilómetros para ser atendidas á hora de dar a luz.

Coincidindo coa xuntanza convocouse unha protesta a través das redes sociais e de servizos de mensaxería ante o Hospital de Verín. Non será a única celebrada esta semana, pois o sábado a Plataforma pola Sanidade Pública da Comarca de Monterrei impulsa unha manifestación en defensa do Hospital de Verín, do que denuncian o seu “desmantelamento”. Neste 25 de novembro, día Internacional contra a Violencia Machista, a Marcha Mundial das Mulleres denuncia que o peche do servizo de partos é un exemplo “de violencia obstétrica contra as mulleres”.

 

Podes ver este artigo na próxima dirección /articulo/social/hospital-verin-deixa-atender-partos-crianzas/20191125163703087365.html


© 2020 Nós Diario