O goberno español atrasa a idade de xubilación a centos de mariñeiros galegos da frota conxeladora. Unha medida que, se lle poñemos a perspectiva de que afecta tamén a quen embarcou nese sector da frota galega ao longo destas décadas, levaríanos a falar de miles, e non de centos, de tripulantes afectados. “Unha canallada, o maior roubo de dereitos sociais da historia da pesca galega”, como enfatiza Xabier Aboi, da CIG, en conversa con Sermos Galiza.
Unha circular do Instituto Social da Mariña (ISM) impide que se poida aplicar o máximo coeficiente redutor a barcos palangreiros e arrastreiros. O que, no Estado español, é falar de barcos e mariñeiros galegos. Duns 90 barcos no caso dos palangreiros e, de engadir os arrastreiros, elevaría os buques afectados a varias ducias máis. Non estamos, pois, perante unha anécdota. Nomeadamente en portos como Marín, Vigo, Ribeira ou comarcas como A Mariña.
[Podes ler a reportaxe íntegra no número 265 de Sermos Galiza, á venda na loxa e nos quiosques habituais]