Tan só 17 persoas novas entran no mercado laboral galego por cada 100 que están perto da xubilación

O relevo no mercado laboral galego fica nunha situación alta de avellentamento, pois a taxa de substitución da poboación activa, aquela que estima a relación entre as persoas que entran dentro do sistema da Seguridade Social e aquelas que se atopan próximas á xubilación, calculado como o cociente entre a poboación afiliada menor de 25 anos e a maior de 55 anos multiplicado por 100, amosa un índice de 17 por cada cento. A afiliación á Seguridade Social creceu no Estado a un ritmo 86% superior ao galego Así se desprende do estudo Afiliacións á Seguridade Social por concello de residencia da persoa afiliada, publicado esta segunda feira polo Instituto Galego de Estatística (IGE) e que analiza diversos aspectos da afiliación do pasado mes de febreiro. Desta forma, na Galiza, por cada 100 persoas que están en idade de abandonar o mercado laboral contabilízanse 17 novas persoas que ingresan ao sistema da Seguridade Social. O avellentamento da masa de traballadoras e traballadores da Galiza tamén se percibe a través do cálculo da súa estrutura por idades. Desta maneira, en febreiro de 2023, por cada 100 persoas afiliadas á Seguridade Social en alta laboral menores de 40 anos, residían na Galiza 223 traballadoras maiores desta idade. As sete grandes cidades galegas, a excepción da Coruña e de Ourense, presentaban para este indicador valores superiores de avellentamento da poboación activa á media galega, que variaban entre unha media de 224,5 persoas maiores de 40 anos afiliadas á Seguridade Social por cada 100 menores desta idade no concello de Vigo e as 243,3 en Ferrol. Na Coruña e en Ourense o indicador atópase por baixo da media, cun valor de 209,6 naprimeira e de 212,5 no segundo. Datos de afiliación En febreiro de 2023 rexistráronse 1.034.758 afiliacións á Seguridade Social na Galiza, 0,6% máis que o mes pasado, en xaneiro de 2023. Destas, 1.014.050 (98%) corresponden a persoas cuxa residencia se atopaba nun dos concellos do país. Porén, un mesmo traballador ou traballadora pode figurar varias veces no sistema da Seguridade Social, tantas como situacións de cotización distintas teña. A Galiza perdeu no mes de xaneiro máis de 40 autónomos por xornada Por exemplo, se unha persoa traballadora desempeña un emprego remunerado por conta allea nunha empresa e, ao mesmo tempo, traballa por conta propia noutra empresa da que é propietaria, figurará polo menos dúas veces no sistema: unha no réxime xeral e outra no réxime de autónomos. Tendo en conta as duplicidades de rexistro, contabilizando non o número de afiliacións senón o de persoas afiliadas, a cifra baixa ás 977.990 persoas en alta laboral ao sistema da Seguridade Social en febreiro de 2023, 0,5% máis que no caso do mes de xaneiro. Por outra parte, en termos interanuais, entre febreiro de 2022 e o mesmo mes do ano 2023, a variación das afiliacións totais na Galiza foi de 1,1%, mentres que tanto o aumento das afiliacións por parte de persoas residentes na Galiza como a do total de persoas con residencia no país dadas de alta no sistema foi de 1%. As cotizacións na Seguridade social concéntranse nas grandes cidades A afiliación tamén amosa a diferente evolución entre as tipoloxías de concello, pois as altas á Seguridade Social concéntrase nas cidades. Desta maneira, o número de persoas afiliadas aumentou nos sete grandes concellos galegos. O maior incremento experimentárono A Coruña e Compostela, onde o número de cotizacións á Seguridade Social aumentou en febreiro en 2,2% respecto ao mesmo mes do ano anterior no primeiro caso, e nunha taxa de 2,5% no segundo. Ademais, en febreiro de 2023, 4,7% das persoas afiliadas á Seguridade Social en alta laboral residentes na Galiza tiña nacionalidade estranxeira. Aínda que os municipios con maior número de persoas afiliadas con nacionalidade de terceiros Estados eran os correspondentes ás sete grandes cidades, en termos relativos, destacaron os concellos próximos á rexión norte de Portugal, Valdeorras e A Mariña. Estrutura por sectores 5,3% das afiliacións en alta laboral de persoas que residen na Galiza corresponderon a actividades relacionadas coa agricultura e a pesca, 14% rexistráronse no sector industrial, mentres que 7,5% foron no sector da construción e 72,7% nas actividades do campo dos servizos. O aumento de 29% da produción de enerxía agocha a caída do resto da industria galega Por sectores, os concellos cunha maior porcentaxe de traballadores e traballadoras afiliadas no sector primario atopábanse en comarcas do nordeste do país como a de Lugo ou Terra de Lemos, nas comarcas do Xallas, Terra de Melide e Arzúa, así como no Deza. Debido ás afiliacións no Réxime especial do mar, concellos como A Illa de Arousa, Camariñas ou Muxía tamén presentaron altas taxas de afiliación no sector primario. Na Coruña e en Compostela máis de 85% das afiliacións de febreiro rexistráronse no sector servizos A industria tivo maior peso nos municipios do suroeste da Galiza e nas comarcas de Valdeorras, Barbanza, Caldas e O Sar. No que respecta á construción, sobresaíron os municipios da zona da Costa da Morte (excepto Corcubión e Fisterra) e Gomesende. No caso do sector servizos amosaron un maior peso nos sete grandes concellos e nos seus municipios limítrofes. Cabe destacar os concellos de Compostela e da Coruña, onde máis de 85% das afiliacións existentes a finais de febreiro de 2023 correspondían ao sector servizos. Unha estrutura laboral moi diversa entre as comarcas Na meirande parte dos municipios, o sector servizos é o que aglutina a maior parte das traballadoras e dos traballadores. Porén, a estrutura produtiva varía dun concello a outro, mentres que as comarcas do interior do país e a Costa da Morte están especializadas no sector primario, as dos sete grandes concellos, a excepción de Vigo, Ferrol e Ourense, están especializadas no sector servizos, ao igual que a Baixa Limia e Verín. As zonas galegas con relevancia industrial As comarcas de Ferrol e Vigo están especializadas na rama da fabricación de material de transporte e grandes reparacións industriais, ao igual que A Paradanta e O Morrazo. Ademais, hai tres comarcas con especialización produtiva na rama da enerxía, subministración de auga e xestión de residuos (Terra de Trives, Ordes e o Eume) e tres están especializadas na industria agroalimentaria (O Salnés, O Ribeiro e O Barbanza). A industria da madeira, papel e mobles sobresae nas comarcas de Betanzos, Tabeirós-Terra de Montes, Terra de Celanova e O Carballiño; mentres que as industrias extractivas e a fabricación doutros produtos minerais non metálicos alcanzan maior relevancia nas comarcas de Ortegal, Quiroga, Valdeorras, O Baixo Miño e O Condado.