Sindicatos critican o plan da Xunta para "vixiar" desempregadas de longa duración

Oanuncio por parte do Goberno galego dun plan para “vixiar a fraude” nas persoas que levan tempo como demandantes de emprego e cobrando un subsidio, abriu o debate sobre o propio papel que xoga o Servizo Público de Emprego da Galiza. Ademais, apuntan cara ao futuro das 139.000 persoas rexistradas nel que non atopan un traballo cando, segundo a propia Xunta da Galiza, hai 15.000 prazas vacantes nas empresas do país. A Xunta utilizará Intelixencia Artificial para “vixiar” persoas desempregadas Sindicatos e patronal discrepan na súa opinión sobre a medida. Para o secreatrio confederal de emprego da CIG, Francisco González Sío, o anuncio resulta “patético”. En declaracións a Nós Diario asegura que o problema de man de obra que hai en certos sectores “está relacionado coas condicións laborais, de escravitude e de baixos salarios que ofrecen as empresas”. Por este motivo, cre que a Xunta “debería preocuparse de mellorar esas condicións cando as empresas demostran todos os días que teñen beneficios millonarios” en vez de “sinalar co dedo as persoas que teñen a mala sorte de estar desempregadas e, nalgúns casos non están polo labor de aceptar salarios e situacións de miseria”. Ademais, desaproba que falen “das persoas de idade que son paradas de longa duración e marcándoas como que non queren traballar e defraudan”. En CCOO aseguran que tiveron coñecemento deste plan “pola prensa”. Así e todo, a súa secretaria de Emprego, Maica Bouza, nunha valoración de urxencia afirma a Nós Diario que "a medida é un parche”, afirma. “Preséntase como unha persecución, como se as persoas desempregadas non queiran traballar, e relaciónase cos postos que non se cobren sen analizar as razóns desta situación”. Rueda rega a precampaña con 115 millóns en axudas e convenios A sindicalista refírese aos postos de traballo “no mar ou da hostalaría”. Bouza entende que é “por non contar coa formación necesaria para estes postos ou polas condicións que se ofertan neses traballos, que non serían dignas para que a xente acepte”. Desde UXT, o seu secretario xeral a nivel estatal, Pepe Álvarez, falaba deste mesmo tema nunhas declaracións realizadas durante un encontro informativo o pasado mes de marzo, que sería favorábel a que se lle quitasen subsidios públicos a quen rexeite unha oferta de emprego. "Unha persoa que rexeita unha oferta de traballo”, defendía o líder sindical, no caso de que estea “a recibir un subsidio público, xa sexa de desemprego, xa sexa mínimo vital, eu creo que o país debería preguntarse se o debe de seguir cobrando ou non". Segundo Álvarez, esta opción sería "moito máis produtiva para España". O plan tamén contou cunha valoración positiva por parte da Confederación de Empresarios da Galiza (CEG). O seu presidente, Juan Manuel Vieites, asegura en declaracións a Nós Diario que coinciden “con medidas que faciliten o seguimento e control da fraude e que se pidan e avalíen as xustificacións aportadas pola persoa demandante cando se producen rexeitamentos de ofertas, o que debe levar á aplicación das consecuencias previstas legalmente cando as xustificacións son insuficientes". O paro de longa duración na Galiza aumentou 45% nunha década As oficinas de emprego “As oficinas de emprego non están facendo o seu labor”, afirma González Sío, “e aínda por riba o Goberno español acaba de aprobar o inicio da privatización do SEPE”, engade. A situación nelas empeorou, segundo a CIG, “coa chegada da pandemia que reduciu a accesibilidade coa atención telefónica”, polo que discrepan que “a solución sexa perseguir as persoas desempregadas de longa duración”. Para o sindicalista o problema do desemprego, daquela, "vén como consecuencia do modelo laboral baseado na especulación". Maica Bouza, pola súa parte, recorda que desde o seu sindicato “vimos demandando unha reforma integral do servizo público de emprego da Galiza”. Nela tería que abordarse, “antes de dar outros pasos”, desde “os recursos técnicos até a necesidades de recursos humanos formados” que traballen “nunha orientación laboral personalizada e mellorando as bases de datos actuais”. En relación ao plan anunciado esta quinta feira, a sindicalista afirma que “dá a sensación de que a Xunta ten uns recursos e deseña un programa que está desenfocado e non vai á raíz do problema”. Por último, desde a patronal, Vieites indica que “estamos de acordo con aquelas medidas que permitan incidir na mellora da clasificación dos demandantes de emprego, porque hai moitas ofertas de traballo que non son atendidas polas persoas inscritas, por mor dos desaxustes que se procuren”. Neste sentido, lembra que “hai unha discordancia importante entre o número de desempregados e o número de vacantes que non se cobren. Algo está a fallar para que non sexamos capaces de casar esa demanda de emprego ". O sector servizos aglutina sete de cada dez parados "Pór en valor" as oficinas de emprego Na quinta feira, o presidente da Xunta, Alfonso Rueda, e a conselleira de Promoción do Emprego e Igualdade, María Jesús Lourenzá, anunciaron un plan para vixiar o que denominaron como "disfuncións" e as "fraudes" que se poidan rexistrar no ámbito da demanda de emprego. A iniciativa comezaría despois do verán e consistiría, segundo Rueda, nun “acompañamento e seguimento intensivo” da demanda de emprego para cubrir unhas 15.000 prazas vacantes en empresas que están "á espera de ser cubertas" mentres o Servizo Público de Emprego da Galiza conta con máis de 139.000 persoas desempregadas rexistradas. Lourenzá explicou os detalles deste programa, no que se analizará a situación de persoas que se atopen en diversas casuísticas, como parados de longa duración, ou quen declinase ofertas de formación ou emprego que, en principio, axustaríanse ao seu perfil. Neste caso, abriríaselle un expediente e poderían concluír nunha sanción ou na retirada de prestacións. A alza do salario mínimo e o mito da destrución de emprego Fontes da Consellaría sinalaron onte a Nós Diario que a intenión desta proposta é "por en valor" as propias oficinas de emprego e a súa función. En relación ás prazas vacantes, 15.000 segundo o anuncio realizado despois do Consello da Xunta, as mesmas fontes recoñecen que "son cifras que nos transmiten nas reunións que mantivemos cos diferentes clústers, mais as empresas non recorren ás oficinas de emprego e confían a contratación por outras vías". Neste sentido, tamén recoñecen que por esta mesma razón "a xente non vai ás oficinas".