O Goberno do Estado español vén de acadar o si do empresariado e dos sindicatos CCOO e UXT para conseguiu cumprir o seu obxectivo, prometido a Bruxelas, de ter lista a reforma laboral antes de que rematase 2021. Após meses de negociacións, a ministra de Traballo, a galega Yolanda Díaz, fala de acordo "histórico".
"Por primeira vez na historia unha reforma laboral deste calado obtén o respaldo unánime dos axentes sociais", indicaron fontes do departamento de Díaz, que lembraron que na noite desta cuarta feira aínda non había pacto ao 100%.
Após que o texto pasara polos órganos de dirección das centrais sindicais CCOO e UXT e as patronais CEOE e Cepyme, conseguironse os avais para a modificación.
Agora existe un acordo a tres bandas para mudar o sistema de relacións laborais en todo o Estado español malia que ao principio chegar a este punto de encontro semellaba moi difícil, ou polo menos facelo antes de finalizar o exercicio en curso.
Após este paso cualificado como "histórico", o Executivo estatal levará a reforma laboral para a súa aprobación ao Consello de Ministros da próxima terza feira, 28 de decembro, para a súa publicación no Boletín Oficial do Estado (BOE) antes de que culmine 2021.
"Todas as partes presentes na mesa de diálogo social negociaron sen escatimar en esforzos para chegar a unha resposta conxunta que permitise dotar as relacións laborais dun novo marco xuridicamente seguro, avanzado, que nos aproxima a Europa e con vocación de perdurar no tempo e de continuar traballando para mellorar o noso país", subliñaron fontes da área de Traballo.
Cuestións concretas
A reforma pactada toca varios aspectos do Estatuto dos Traballadores, como a contratación e a negociación colectiva, e ten entre os seus principais obxectivos a redución da elevada temporalidade que existe actualmente para as e os traballadores no Estado.
Así, o texto presentado polo Goberno na mesa de diálogo social, e ao que tivo acceso Europa Press, estabelece que o contrato de traballo ordinario será o indefinido e que só poderán facerse dous tipos de contratos temporais: o estrutural e o formativo.
O primeiro deles, o estrutural, só poderá responder a dúas causas. Estas serán circunstancias da produción e por substitución doutro traballador con reserva de posto de traballo, a condición de que quede perfectamente especificado a quen substitúe o traballador contratado.
Así mesmo, as partes acordaron reducir a 18 meses nun período de 24 meses o prazo de encadeamento de contratos para adquirir a condición de traballador indefinido, fronte aos 24 meses nun período de 30 meses vixente actualmente.
O incumprimento das normas que regulan a contratación temporal levará a que o traballador sexa considerado indefinido. De feito, elevaranse as sancións contempladas na Lei de Infraccións e da Orde Social (LISOS) polo uso fraudulento da contratación temporal, marcándose sancións por cada situación fraudulenta e non por empresa.
