José López Orozco declinou na xornada de onte negociar co cadro de persoal de Urbaser un decreto de servizos mínimos consesuado. E fíxoo na xuntanza desenvolvida no concello de Lugo o 4 de agosto após solicitaren @s representantes das traballadoras e traballadores en folga reunírense co alcalde para procurar un novo decreto.
A folga do lixo en Lugo cumpre o vindeiro día 10 de agosto dous meses
O comité de folga actuou desta maneira após o xulgado de Lugo declarar a suspensión dos servizos mínimos decratdos por Orozco o pasado 23 de xullo. Segundo a xustiza estes supuñan unha vulneración do dereito a folga ao exixir @s operari@s cubrir o 100% das súas funcións no decorrer dunha greve indefinida que cumprirá o vindeiro día 10 de agosto 2 meses.
Orozco di que de chegaren a un acordo coa empresa, modificará o decreto
Desde a alcaldía emprazaron @s traballadores e traballadoras a procurar unha solución con Urbaser ao afirmar que o decreto publicado inicialmente, no que tamén se fixaban uns servizos mínimos do 100% e por cuxo incumprimento foron despedid@s 12 operari@s, aínda estaba en vigor. "Dixolles que estaba en vigor o primeiro decreto e que só no caso de que chegaran a un acordo entre persoal e empresa modificaría o decreto", aseguraron fontes próximas á xuntanza a Sermos Galiza.
O persoal lembra que a súa postura continúa a ser "unánime" mais amósase disposto a reiniciar as negociacións con Urbaser
Desde o comité aseguraron nun comunicado de imprensa que a decisión xudicial reflicte "as prácticas antisindicais que o goberno local vén desenvolvendo desde o inicio do conflito" ao tempo que afirmaban a súa vontade por procurar unha nova fórmula que permitise ao persoal "desenvolver a folga" co "menor prexuízo posíbel para a sociedade" mais "respectando os dereitos de todas e todos".
Porén, a postura do alcalde lugués, que se mantén á marxe da resolución do conflito desde o comezo da greve, impediu chegar a ningún acordo. Desde o comité de folga reiteraron a súa disposición para acadar un acordo tamén coa empresa e amosáronse favorábeis a sentar de novo na mesa de negociación, se ben, lembrar que a postura da asemblea de traballador@s continúa a ser "unánime" malia as informacións difundidas nos últimos días pola imprensa local.