Un operario dun barco tivo que ser trasladado a un centro hospitalario tras resultar ferido esta pasada segunda feira mentres traballaba no porto de Celeiro, na localidade mariñá de Viveiro.
Tal e como vén de informar o 112-Galiza, os feitos ocorreron minutos despois das 23 horas da segunda feira, cando os servizos de emerxencias recibiron a alerta de que un operario precisaba asistencia após lesionarse unha perna mentres se atopaba na sala de máquinas dun barco que se dispuña a saír a faenar.
A pesar de que os sanitarios puideron retirar o traballador da estancia na que se atopaba, os bombeiros tiveron que facer uso dunha escaleira para sacalo da embarcación e trasladalo posteriormente ao Hospital de Burela.
Até o lugar desprazáronse os profesionais de urxencias sanitarias, Bombeiros de Viveiro, Policía Nacional e Local e Protección Civil.
