Un operario faleceu ao quedar atrapado nunha máquina de tratamento de casca de piñeiro no municipio de Boqueixón (comarca de Compostela). Unha chamada alertou o 112 Galiza na tarde desta quinta feira debido a un accidente laboral nun serradoiro da parroquia de Codeso, en Boqueixón.
A primeira comunicación cos xestores de emerxencias indicaba que a vítima estaba inconsciente e necesitaba axuda inmediata para liberarse da máquina que o mantiña atrapado.
Posteriormente, os equipos de intervención confirmaron o falecemento desta persoa. O 112 mobilizou un operativo con bombeiros de Santiago e Ordes, voluntarios de Protección Civil, unha dotación do 061 a bordo do helicóptero e Garda Civil, entre outros.
