A precariedade e temporalidade laboral teñen consecuencias na seguridade no traballo. É un dos factores a ter en conta e que os propios datos confirman, como indican na campaña de denuncia que impulsa Comisións Obreiras en Galiza e na que se bota man de estatísticas para indicar que de cada 100 persoas asalariadas con contrato indefinido, 2,4 sufriron un accidente. Entre as que teñen contrato temporal, esa porcentaxe aumenta a 4,5 cada 100, case o duplo. A temporalidade laboral é un factor que foi en aumento ao longo destes anos de crise e que en determinados sectores é case que implícito aos mesmos.
No traballo 'Determinantes da sinistralidade laboral' os profesores Inmaculada García eVíctor Manuel Montuenga analizan series de datos e estatísticas de accidentes no traballo en todo o Estado para concluír que hai unha relación entre os diferentes tipos de accidentes e a temporalidade, a contratación mediante empresas de traballo temporal (ETT), ou a antigüedade da empresa, entre outros.
A siniestralidade laboral bateu récords en Galiza en 2015, un ano no que os traballadores e traballadoras falecidos no noso país en accidentes laborais foi o máis elevado dos últimos anos: 64. En todo o 2014 , a cifra de traballadores mortos foi de 59. En 2013 foron 47 e en 2012, 45. Así pois, o noso país acumula catro anos consecutivos de aumento nas cifras de mortalidade por sinistralidade no traballo.
