O pesqueiro de bandeira francesa María Reina Madre, con base e armador no porto galego de Burela (A Mariña), afundiuse finalmente ao fracasar as manobras para recuperar a súa flotabilidade, segundo informou o delegado do Goberno español en Euskadi, Denis Itxaso.
Itxaso achegouse esta sexta feira ao porto guipuscoano de Pasaia para recibir "sans e salvos" aos 14 tripulantes rescatados deste buque.
O pesqueiro María Reina Madre, procedente do porto de Burela, ía pasar unha revisión no porto de Gipuzkoa antes de seguir faenando en augas francesas.
Con todo, a nove millas ao norte de Donostia o barco sufriu unha vía de auga que asolagou a sala de máquinas, polo que debeu ser evacuado "en apenas 38 minutos desde o primeiro aviso recibido no Centro de Coordinación de Salvamento Marítimo de Bilbo cara ás nove da mañá", segundo explicou Itxaso.
Itxaso sinalou que desde Capitanía marítima tentouse remolcalo, xa que o vento do sur estaba a empuxalo a augas xurisdicionais francesas. Con todo, confirmou que, finalmente, o buque terminou por afundir "ao non prosperar as manobras para recuperar a flotabilidade".
