O Diario Oficial de Galiza (DOG) publicou a declaración de impacto ambiental do parque eólico Monteiro, que afecta os concellos de Baleira, Baralla e Becerreá (comarcas da Fonsagrada e Os Ancares), con resultado favorábel.
Tal e como se recolle no DOG, o anuncio depende da Dirección Xeral de Calidade Ambiental, Sostibilidade e Cambio Climático, que considera o proxecto "ambientalmente viábel".
O proxecto, promovido por Greenalia Wind Power, S.L.Ou e cunha potencia de 33,6 MW, cun investimento previsto de máis de 25 millóns de euros, instalarase entre os concellos de Baralla, Baleira e Becerreá.
Instalará 8 aeroxeradores, de 4,2 MW nominais, cunhas características de 107 metros de altura e 150 de diámetro de rotor.
Declarado iniciativa empresarial prioritaria pola Xunta
O parque eólico Monteiro é un dos 13 proxectos eólicos que teñen como obxectivo garantir a subministración de enerxía a longo prazo a Alcoa e o Grupo Cortizo e que a Xunta da Galiza declarou iniciativas empresariais prioritarias o pasado mes de marzo.
Os trece parques que lograron esta declaración supoñen un investimento total de 380 millóns e unha potencia de 356 MW. Por unha parte, están os parques de Greenalia Wind Power: Monte do Cordal (Friol), Acevedal (A Pastoriza), Carballal (A Pastoriza), Restelo (A Fonsagrada, Baleira, Becerreá e Navia de Suarna), Monteiro (Baleira, Becerreá e Baralla) e As Louseiras (A Pastoriza e Meira); Felga (Oza-Cesuras e Aranga), Gato (Coirós, Oza-Cesuras e Aranga), Penas Boas (Oza-Cesuras e Aranga) e Coto Muíño (Vimianzo e Zas); e Lamas II (Calvos de Randín, Baltar e Os Blancos. Así como Serra do Colmo (en Becerreá e Baralla) promovido por Enel Green Power. Todos estes parques teñen un acordo de compravenda de enerxía a longo prazo con Alcoa.
O pasado mes de xuño, a compañía enerxética Greenalia alertaba sobre "a inseguridade xurídica que está a xerar" para o desenvolvemento de proxectos industriais na Galiza o criterio que aplica o TSXG na sentenza relativa aos parques eólicos Bustelo e Campelo, cuxas licenzas outorgadas pola Xunta foron anuladas alegando "indebida fragmentación" dun único proxecto en tres
