As obras continúan no monte Acibal malia a sentenza que ordena paralizalas, denuncia Amil sen Eólicos

O Tribunal Superior de Xustiza da Galiza (TSXG) asestou esta cuarta feira un novo golpe á política enerxética da Xunta ao acordar a suspensión cautelar das obras —xa comezadas— do parque eólico Acibal, da promotora Norvento e autorizado polo Goberno galego nos termos municipais de Barro, Campo Lameiro e Moraña. Os xuíces do alto tribunal amparáronse así nos danos ao medio ambiente que denunciara Ecoloxistas en Acción.

A Sala concluíu no seu auto que as actuacións previstas no proxecto do parque "afectan os hábitats de interese comunitario e de especies catalogadas situados no humidal das Brañas de Amil, así como aos petróglifos aí situados, do mesmo xeito que no monte Acibal e no Curro de Amil, afectación cuxa maior ou menor intensidade e grao de protección, corrección ou compensación determinaranse —no seu caso— no recurso principal".

Porén, segundo denuncia —perante un vídeo gravado a primeira hora desta cuarta feira— o colectivo Amil Sen Eólicos, as obras continuaron hoxe cun guindastre traballando sobre o monte Acibal, rico en petróglifos e pedras históricas e que xa fora dinamitado en xullo pasado.

25 de Outubro de 2023

Pese á sentenza do TSX de onte, continúan as obras no Acibal

Aquí, a sentenza: https://t.co/e1SrS6smWj

Levamos solicitando esta paralización dende MARZO á @Xunta, vese que non hai presa nin cando o dí o TSX.

Qué mais fai falla para que deixen de 💣💣💣? pic.twitter.com/cm9wM4mAJ8

— Amil SEN Eólicos (@AmilSenEolicos) October 25, 2023

Pese á sentenza do TSXG de onte [pola terza feira], continúan as obras no Acibal. Levamos solicitando esta paralización desde marzo á Xunta, vese que non hai présa nin cando o di o TSXG. Qué mais fai falla para que deixen de dinamitalo?", censuran desde a plataforma.