O Sermos 260 métese de cheo no anteproxecto da Lei de Saúde e no novo mapa sanitario que implica unha sanidade máis afastada das persoas usuarias. O anteproxecto fixa a eliminación das áreas sanitarias do Barco, A Mariña, Monforte e O Salnés. Unha decisión que lle confire aos grandes complexos hospitalarios unha enorme capacidade de absorción de recursos e que converte os hospitais comarcais en “ambulatorios grandes”.
En “A vixencia da filosofía. Necesitamos pensar” é a reportaxe que contempla o ámbito do pensamento como un factor fundamental para unha sociedade con capacidade crítica e de reflexión. Con motivo da inminente entrega das sinaturas da campaña Filosofía Si no Parlamento Galego –busca a obrigatoriedade de Historia da Filosofía en 2º de Bacharelato–, conversamos coas súas promotoras e promotores.
O reforzamento do ensino concertado por parte do Goberno galego; o caos nas Illas Cíes ou a política conservadora do PP na Galiza son outros dos temas recollidos no semanario, que analiza o fascismo nos EUA e a resposta da Generalitat aos atentados jihadistas. O sobrecusto do financiamento da Xunta a través dos bancos e a xestión portuaria engádense aos asuntos tratados.
O Fóra de Serie abre cunha interesante información que dá conta do Reino de Galiza nas crónicas europeas, dentro da documentación medieval, que se presenta como a segunda parte da información publicada no semanario número 256 que aludía ao Reino de Galiza nas fontes árabes. Tamén é salientábel a nova entrega de A ollada náufraga, a columna do escritor Francisco Castro.
A entrevista cultural da semana dedícase ás Tanxugueiras, o fenómeno da música tradicional deste verán. Non será o único asunto musical recollido no Fóra de Serie, pois Navia Rivas achéganos composicións saídas dos EUA contra o fascismo.
Todo isto e moito máis, como as achegas de Xoán Costa, Guillerme Vázquez, Marga do Val, Nacho Hortas, Tokio, Andrés Castro e Mario Regueira.
[Podes facerte co semanario na loxa ou nos quiosques habituais]