A ONG Save the Children vén de emitir un informe no que evidencia que o Estado español é o que posúe unha maior taxa de repetición de curso escolar dentro da Unión Europea e a OCDE, cunha cifra moi elevada: 29% do alumnado repetira curso, cando menos unha vez, ao alcanzar os 15 anos de idade.
Deste modo, o Estado ten unha taxa até oito veces superior á de Finlandia e once en comparanza coa do Reino Unido, malia que a lexislación educativa é moi semellante.
E, no caso concreto da Galiza, no ano escolar previo á irrupción da Covid-19 —dado que coa pandemia houbo unha considerábel redución para non prexudicar as e os estudantes—, 2019-20, a taxa foi mesmo superior á media estatal na ESO no primeiro curso —9,4% fronte a 8,9%— e o terceiro —9,6% fronte a 8,8%—, mentres foi idéntica no cuarto —7,5%—.
Porén, o documento publicado por Save the Children pon en cuestión a chamada 'cultura da repetición'. "Non só un sistema educativo pode funcionar cun nivel residual de repetición de curso, senón que é o máis común nos países desenvolvidos, que recorren a outras estratetxias para xestionar as diferenzas de nivel entre o alumnado", explica a entidade.
Repetir, unha cuestión de clases?
Aliás, a ONG pon de manifesto os condicionantes sociais: "Ante dous estudantes con coñecementos, dificultades de aprendizaxe e niveis de motivación semellantes, o do nivel socioeconómico e cultural máis baixo ten case tres veces máis probabilidades de repetir que o de clase acomodada".
Na mesma liña, defende que un de cada tres repetidores ou repetidoras no Estado "alcanzaron o nivel básico de PISA en todas as materias e lograron as metas estabelecidas ao remate da escolarización obrigatoria".
Efecto "nulo" sobre a aprendizaxe
As investigacións das últimas dúas décadas sobre esta cuestión, precisan, "conclúen que a repetición ten un efecto nulo sobre a aprendizaxe e prexudica o alumnado de baixo nivel educativo e socioeconómico".
Neste senso, se ben a repetición pode ter "efectos positivos" nese ano, estes "disípanse" e mesmo poden "tornar negativos" ao avanzar a escolarización. "No longo prazo contribúe ao abandono", lamentan.
Mesmos contidos e da mesma forma
Aliás, cando un alumno ou alumna repite curso no Estado español, "os contidos son os mesmos, impartidos da mesma forma e sen medidas de acompañamento", polo que o único que supón a repetición, afirman, é "reducir significativamente a autoestima e o esforzo do estudantado".
