"Considérase inadecuado [...] usar vestimenta que supoña unha exhibición do propio corpo: shorts ou minisaias excesivamente curtas, torsos descubertos, camisas abertas, pantalóns excesivamente baixos, escotes esaxerados ou similares". Este texto, dun código de vestimenta do IES de Ames (comarca de Compostela), está no albo da polémica despois de que circulase esta fin de semana polas redes sociais.
O documento tamén contempla outras medidas de vestir —"estar no recinto coa cabeza cuberta (agás por motivos de saúde ou crenza relixiosa), usar vestimenta propia de praia ou piscina"—.
Todas elas, segundo recoñeceu o propio centro de ensino, seguen en vigor, mais non se aplican. "Non se aplica nin se persegue", en palabras da dirección a Nós Diario, que se refire tamén á "sensibilidade" para cos asuntos de xénero que existe neste instituto.
"Normas de convivencia"
O documento é resultado da lei estatal de convivencia escolar e pola que se estabelece nos centros unha normativa de funcionamento e organización, que foi aprobada no seu día polo Consello Escolar deste IES do municipio de Ames. No marco desa normativa, fíxanse unhas "normas de convivencia", principios que fan referencia a aspectos como "non discriminar ningún membro da comunidade educativa por razón de nacionalidade, raza, orientación sexual, crenzas relixiosas ou por calquera outra circunstancia persoal ou social".
Mais o punto que volveu esta fin de semana a se situar no albo da polémica foi o que se refire á vestimenta, nomeadamente no que atinxe á referencia a ver "inadecuado" o uso de "shorts ou minisaias excesivamente cortos, [...], pantalóns excesivamente baixos, escotes esaxerados ou similares".
Diferenzas
Nas redes sociais o debate axiña prendeu, con dúas posturas claramente diferenciadas. Por unha parte, quen criticaban que nun centro público se estabelecesen ese tipo de normas de vestimenta ("para iso que obriguen a levar un burka"), até quen entendía o sentido dese código ("hai que saber o lugar no que un está. Un centro escolar non é a praia, nin a praza da vila, nin un pub. É triste ter que deixalo por escrito, pero é así").
