Profesionais de Enfermaría poderán receitar ibuprofeno e paracetamol para tratar a febre

O Ministerio de Sanidade ampliou as posibilidades de indicación, uso e autorización de dispensación de medicamentos suxeitos a prescrición médica por parte de enfermeiras e enfermeiros, que agora poderán prescribir tamén ibuprofeno e paracetamol para tratar a febre.

En concreto, a guía, que se publicou esta cuarta feira no Boletín Oficial do Estado (BOE), pretende orientar as actuacións dos enfermeiros (indicación, uso e autorización de dispensación de medicamentos), xa sexa para iniciar o seu uso, modificar a pauta, prorrogar, suspender o tratamento ou finalizalo.

O documento, que se aprobou na Comisión Permanente de Farmacia no pasado mes de outubro, foi acordado polo Ministerio de Sanidade co Consello Xeral de Enfermaría (CGE) e a Organización Médica Colexial (OMC), entre outros representantes de profesionais sanitarios.

Trátase da sexta guía de dispensación de medicamentos suxeitos a prescrición médica por parte dos enfermeiros. Previamente, o Ministerio de Sanidade publicou guías para Enfermaría en casos de feridas, diabetes tipo 1 e tipo 2, queimaduras, ostomías e sobre anticoagulantes orais.

"Axuda aos profesionais"

Tal e como se recolle no BOE, os contidos descritos nesta guía pretenden "ser unha axuda aos profesionais para mellorar os resultados en saúde das persoas que atenden, a través dunha atención sanitaria integral, segura, colaborativa, de calidade, baseada na evidencia e centrada na persoa", e búscase garantir a continuidade asistencial.

Para ese efecto, os criterios para a selección da guía foron a incidencia ou prevalencia das situacións clínicas que abordan, a garantía de seguridade clínica na aplicación das guías e o valor engadido que poida achegar unha abordaxe precoz, equitativa e colaborativa dos síntomas e situacións de saúde aos que estas guías se refiren.

Tendo en conta a relevancia clínica de estabelecer a etioloxía deste síntoma, a decisión de reducir a febre con antitérmicos asume que non hai beneficio diagnóstico ao permitir que a febre persista, e permite en pacientes sen contraindicacións para os antitérmicos, o control do síntoma, a prevención de complicacións e mellorar o confort do paciente.

O seguimento do tratamento con antitérmicos é unha práctica habitual dos enfermeiros no ámbito das súas competencias, tanto en Atención Primaria como no ámbito hospitalario, así como da educación sanitaria á poboación para a autoxestión de síntomas leves e a promoción da saúde e hábitos de vida saudábeis.

A intervención de enfermaría, que posibilita a indicación de antitérmicos, intégrase como unha parte máis do conxunto da abordaxe, proceso diagnóstico e tratamento global das persoas con febre, e está destinada a controlar o síntoma, aumentar a confortabilidade da persoa, e diminuír as complicacións asociadas ao mesmo.

Por tanto, a actuación enfermeira que describe esta guía circunscríbese ao manexo farmacolóxico da febre como síntoma, e en ningún caso exclúe a valoración médica coa aplicación das medidas que a situación clínica do paciente precise.