Francisco M.R., traballador do mar, activista sindical, ía ser xulgado esta segunda feira por un suceso que decorreu hai catro anos, na greve xeral de marzo de 2012, e polo que o ministerio fiscal lle pide máis de 12.000 euros de multa. A última hora o xuízo foi adiado, mais ás portas do xulgado decorreu unha concentración de solidariedade para con este mozo ferrolán, militante independentista, concentración que contou co apoio de sindicatos como CIG e CNT, para alén de diferentes colectivos da comarca e de persoas que asistiron a título individual. “Solidariedade Obreira” e “Xulgan sindicalistas, medran escravistas” foron algúns dos lemas que se podían ler nas faixas despregadas no acto.
Os feitos polos que se xulga a Francisco M.R. tiveron lugar durante a mobilización convocada pola CIG no marco daquela greve xeral, lembra el propio en conversa con Sermos Galiza. Nun momento da marcha, na que tomaban parte centos de persoas, un coche [“conducido por un fascista”, di] subiu á beira-rúa e intentou pasar acelerando polo medio da manifestación. Unha perigosa manobra “na que arrollou unha rapaza”. “Él quería colarse e subiu pola beirarrúa, xa que tiña outro coche diante. Nós tentamos que parara mais non nos fixo caso. Tiven tempo de afastar o meu fillo e a miña nai, que estaban canda min, e púxenme no medio para paralo. Non freou, o que fixo foi acelerar e pasoume a roda por riba da perna, dúas veces. Foi terríbel”, comentou esta muller naquela xornada en declaracións recollidas por varios emdios de comunicación.
Penas
Varios manifestantes, lembra Francisco, intentan entón parar o carro e sacar as chaves do condutor. Consígueno e nese momento, continúa a versión, chega a policia, que se fai cargo da situación. A manifestación prosegue o seu percorrido con normalidade. “A min ninguén se me achegou para pedirme a documentación ou que me identificase. Nada”, sostén Francisco, que relata a súa sorpresa cando dous anos despois recebe unha citación do xulgado no que se lle acusa dun delito de danos en relación a eses feitos. “12.000 euros por dúas pancadas a un carro que case nos atropella e a piques estivo de matar a alguén”, resume. A petición do Ministerio Fiscal é dunha multa de quince meses de duración a razón de sete euros diarios.
Acordo
A finais de 2015 ía ter lugar o xuízo por estes feitos. O seu avogado propúxolle chegar a un pacto co que pagaría só 900 euros de multa e 800 euros de danos. “Negueime, négome a pagar un peso a quen intentou atropelar xente nunha manifestación”. A decisión de non aceptar o trato foi apoiada, afirma, polo sindicato.
O condutor do vehículo estaba acusado dun delito de lesións por imprudencia grave polo que o fiscal solicitaba no seu momento unha condena de seis meses de prisión e a privación do dereito a conducir vehículos a motor e ciclomotores por dous anos.
