Unha muller morreu na tarde desta terza feira en Vigo, na estrada do Freixo, após ser atropelada por un autobús urbano do que acababa de baixarse.
Segundo informa o 112 Galiza, ocorreu pasados uns minutos das 17 horas nun lugar próximo ao cemiterio de Valadares. O alertante foi o propio condutor do autocar para indicar que atropelara a esta persoa coas rodas traseiras do autobús, e que a muller permanecía atrapada debaixo do vehículo.
Seguidamente, a central de emerxencias puxo os feitos en coñecemento de Urxencias Sanitarias de Galiza-061, dos bombeiros de Vigo, da Policía Local e da Garda Civil de Tráfico.
Os bombeiros, cando chegaron ao lugar, indicaban que a muller atropelada estaba liberada e accesíbel, pero os servizos médicos non puideron facer nada por salvarlle a vida.