O ministro de Sanidade do Estado español, José Miñóns, replicou ao presidente da Xunta da Galiza, Alfonso Rueda, que "cada verán sucede o mesmo" coa Sanidade pública, pero o Goberno galego "non lle pon remedio".
Díxoo esta sexta feira tras un acto en Compostela, a preguntas dos medios de comunicación sobre as palabras de Rueda, que esta quinta recoñeceu que o verán é unha “situación complicada” para a sanidade galega. Así o afirmou o presidente da Xunta, preguntado por Nós Diario sobre as denuncias de persoal do Sergas polas consecuencias do feche de 665 camas en hospitais.
"É algo que se vai repetindo ao final no tempo, non é algo novo; cada verán sucede o mesmo e temos as mesmas declaracións do presidente da Xunta, sexa un ou sexa outro, e non lle poñen remedio", advertiu.
Neste sentido, destacou que "é moi importante sinalar" que a situación actual "vén precisamente de recortes en formación de profesionais sanitarios" de anos como 2015 e 2016, nos que dixo que non se sacaron a oferta de MIR máis de 200 prazas "para hoxe en día poder ter ese reforzo".
Pola súa banda, o Executivo español insiste ás comunidades en que oferten "todas as prazas" e insta á Xunta a "analizar cales son as causas específicas" para que na Galiza "queden prazas vacantes" a pesar de estar a ofrecer o 100% nos últimos anos.
"Nós imos seguir apostando pola Sanidade pública", concluíu Miñóns, para rexeitar entrar "na autoxestión que ten que facer a Xunta" dos seus centros de saúde. En calquera caso, o titular de Sanidade avisou: "a demanda existe todo o ano e os problemas están a existir todo o ano".
“Cero médicos no paro”
A este respecto, o conselleiro de Sanidade, Julio García Comesaña, asegurou que as urxencias están "garantidas" este verán na Galiza nos Puntos de Atención Continuada (PAC) cos persoais de persoal e as quendas cubertas". "Non hai problemas de ocos sen cubrir", afirmou.
Comesaña fixo estas declaracións a preguntas dos medios nun acto na Coruña sobre a necesidade de reforzar os servizos sanitarios na Galiza coa chegada das vacacións e a avalancha de turistas.
"Temos cero médicos no paro para poder contratar nunha substitución", indicou. "A práctica habitual desde hai moitos anos", explicou, son fórmulas como "a prolongación de xornada dos médicos ou autocobertura para garantir que cando un falta outro bote unha man". Neste sentido, agradeceu o "esforzo grandísimo" por parte dos profesionais para que este modelo funcione.
