O feche de 665 camas e a falta de persoal deixan os hospitais galegos na UCI

Os recortes aplicados pola Xunta da Galiza para a tempada de verán déixanse notar na calidade asistencial dos centros hospitalarios do país. Neste sentido, destaca a falta de persoal, como consecuencia da negativa do Servizo Galego de Saúde (Sergas) a cubrir as vacantes de profesionais xeradas polas vacacións estivais. Na mesma dirección, as autoridades sanitarias teñen procedido a reducir os medios materiais da Atención Especializada, mediante o fechamento de camas na práctica totalidade das áreas sanitarias galegas. Ao tempo, os recortes en Atención Primaria teñen o seu impacto na rede hospitalaria, particularmente no servizo de Urxencias, obrigado a prestar os servizos que non cobren os centros de saúde e os puntos de atención continuada (PAC). A xerencia da área sanitaria de Vigo decidiu fechar 135 camas hospitalarias desde o 1 de xullo ao 30 de setembro. A cifra representa 12,59% de 1.090 prazas dispoñíbeis nos hospitais Meixoeiro e Álvaro Cunqueiro e prodúcese nun momento onde a poboación da zona aumenta polo efecto do turismo. Ademais, a medida adóptase nun momento en que a Consellaría de Sanidade negocia coa dirección do hospital privado Povisa ampliar o número de prazas. A calidade asistencial A diminución da oferta sanitaria está a provocar problemas aos pacientes e unha caída da calidade asistencial. Sen ir máis lonxe, na terza feira, a federación de sanidade da CIG denunciaba que “isto está a provocar que unha media diaria de entre 20 e 25 pacientes teñan que agardar dun día para outro en urxencias á espera de que se produzan altas, co conseguinte trastorno para os doentes e os seus familiares”. Na mesma dirección, advertía de que “o feche de camas está a supor un atraso no ingreso nas plantas, sobrecargando o servizo de urxencias e tendo que improvisar solucións como o desdobramento de camas”. Unha situación análoga á de Vigo dáse na área sanitaria de Pontevedra. Neste caso, é o sindicato médico CESM leva advertindo desde comezos de xullo de problemas para internar pacientes, até o punto de que na primeira semana do mes “no servizo de Urxencias do hospital Montecelo acumuláronse até 40 doentes con esperas de máis de 24 horas para que se lles asígnase unha cama”. Nesta dirección, culpan da situación “á mala xestión das camas, co fechamento de camas en época estival, e co fechamento da planta de Medicina Interna, que a xerencia impón todos os anos para aforrar persoal e gasto, o que supón unha falta de camas para hospitalización”. A área sanitaria de Pontevedra mantén cerradas 122 camas nos seus centros hospitalarios. 24 delas sitúanse no hospital do Salnés, en Vilagarcía, que tradicionalmente aumenta o número de pacientes nos meses de verán pola importante actividade turística da comarca. As 98 restantes atópanse nos diversos centros do Complexo Hospitalario Universitario de Pontevedra (CHUP), onde fican sen actividade a planta de Medicina Interna do hospital provincial e áreas de cirurxía e traumatoloxía do hospital de Montecelo. A situación de Vigo e Pontevedra repítese nas áreas sanitarias da Coruña, Ferrol, Lugo e Compostela. Así, na Coruña atópanse fóra de servizo 163 camas, todas elas emprazadas nos hospitais da cidade, permanecendo en funcionamento todas as instaladas no hospital de Cee. Pola súa parte, na área sanitaria de Ferrol non están operativas 36 camas do servizo de Medicina Interna do hospital Militar, cuxo persoal é trasladado a outros centros do Sergas, e na de Lugo 138. Neste último caso, 68 correspóndese co Hospital Universitario Lucus Augusti (HULA) de Lugo, 38 co hospital da Mariña, emprazado en Burela e 28 co hospital de Monforte. Sen persoal Os hospitais de Compostela suman 99 camas fechadas. A este respecto, o presidente da Asociación de Pacientes do CHUS, Fernando Abraldes, crítica, en declaracións a Nós Diario, “o maltrato aos pacientes oncolóxicos” e advirte da existencia de “pacientes oncolóxicos sen cita e sen ningunha garantía de que van ter a revisión da súa enfermidade e os controis e probas diagnósticas necesarios no tempo que corresponde”. Nesta liña, denuncia que a Consellaría de Sanidade “segue a antepor criterios de xestión de recursos fronte aos protocolos que o propio Sergas acepta para o seguimento de pacientes con esta doenza”. Abraldes, apunta que “os recortes do verán son de dous tipos. Por unha parte féchanse as axendas dos médicos que nos están dispoñíbeis e non se cobren as súas baixas. Por outra, demóranse as consultas externas e féchanse as camas”. Porén, explica que “é algo que vai máis alá do conxuntural, xa que o nivel de ocupación das camas nos momentos normais no CHUS nunca supera 55%”. Nesta dirección, Fernando Abraldes indica que “as camas existen, pero falta persoal, polo que o sistema colapsa e afecta a totalidade dos servizos”. Ourense mantén todas as camas hospitalarias da súa área sanitaria abertas pero os problemas de ausencia de persoal non permiten prestar unha atención axeitada aos doentes. Así, por exemplo, os profesionais do hospital do Barco (Valdeorras) denuncian a “situación insostíbel na que se atopa o servizo de hematoloxía xa que a única profesional con presenza física vai estar ausente temporalmente, polo que as persoas doentes están a ser atendidas telefonicamente”. A Xunta reduce durante o verán as prestacións sanitarias en toda Galiza As medidas adoptadas polo Goberno galego no verán son rexeitadas polas entidades en defensa da sanidade pública. Así, o voceiro de Sos Sanidade Pública, Manuel Martín sinala a Nós Diario que “o feche de camas mantén os hospitais semiparalizados e así non hai xeito de rematar coas listas de agarda”. Neste sentido, advirte de que “o feche de camas mantén e incrementa as listas de espera, onde temos un tapón desde hai dous anos pola Covid, polo que sería o verán a época do ano ideal para reducir as listas”. Martín asegura que “a redución de camas e a falta de persoal impiden que o sistema hospitalario funcione de forma axeitada, ao non contar con medios para atender a xente que acode” aos mesmos. Asemade, lembra que “a ausencia de profesionais nos centros de Atención Primaria provoca nos meses de verán que moitos pacientes se vexan na obriga de ir directamente aos servizos de Urxencias dos hospitais, o que satura estas unidades e provoca auténticos colapsos no sistema hospitalario”. O secretario da CIG-Saúde, Manuel Moreira, sinala a Nós Diario, que “o fechamento de camas supón que haxa menos dispoñibilidade para atender un paciente que entra nun hospital e que debe agardar para ser internado”. A maiores, afirma que “acumula moitas persoas en Urxencias e fai máis difícil a xestión do servizo e a capacidade de atención aos doentes". A este respecto, considera que a falta de persoal “é resultado de políticas de moitos anos por parte da Xunta de maltrato aos sanitarios".