O Ministerio de Sanidade e as comunidades acordaron aumentar as prazas en Formación Sanitaria Especializada (FSE) en 4%, convocando un total de 429 novas prazas, até as 11.600 segundo anunciou o ministro de Sanidade, José Miñóns, en rolda de prensa esta quinta feira. Delas, un total de 638 estarán na Galiza.
En total, no conxunto do Estado español alcanzouse a cifra de 11.600 novas prazas, 8.767 de Médico Interno Residente (MIR), 217 máis que en 2022; e 2.106 de Enfermeiro Interno Residente (EIR), o que supón un incremento do 7,4% con respecto a 2022, cando a cifra foi de 1.961.
O exame será o 20 de xaneiro de 2024, a fin de que se poida comezar a selección en abril. "A oferta volve ser de récord, histórica", expresou Miñóns, para engadir que o obxectivo é "reforzar o sistema sanitario público coa formación dos que serán no día de mañá os profesionais sanitarios".
En canto ao MIR, Miñóns destacou que se convocaron un total de 2.489 de Medicina de Familia e Comunitaria, 34 máis que o ano pasado (2.455), ano en que quedaron un total de 131 prazas vacantes da especialidade.
638 prazas
Nunha nota de prensa tras a reunión da Comisión de Recursos Humanos do Sistema Nacional de Saúde, a Xunta destacou que o Servizo Galego de Saúde (Sergas) presentou a maior oferta feita até o de agora na Galiza, con 638 prazas, 18 máis que na oferta do ano 2022.
A Xunta sinalou que, un ano máis, o país galego continúa incrementando o número de prazas ofertadas respecto da anterior convocatoria, en especialidades como Medicina Familiar e Comunitaria, Pediatría, Medicina Interna, Psiquiatría, Psicoloxía Clínica ou Enfermería especialista en saúde mental.
Centros sanitarios das áreas de Vigo, Ferrol, Santiago-Barbanza, A Coruña-Cee, e Lugo, A Mariña e Monforte de Lemos as novas prazas formativas.
