O mercado negro de citas para Estranxeiría chega á Coruña

Nas últimas semanas multiplícanse as queixas de residentes na Galiza de nacionalidade estranxeira a quen non lles é posíbel renovar a Tarxeta de Identificación de Estranxeiro, tamén coñecida Número de Identidade de Estranxeiro (NIE) no departamento de Estranxeiría da Xefatura Superior da Policía da Coruña. O Número de Identidade de Estranxeiro (NIE) é un documento imprescindíbel para unha cidadá ou un cidadán estranxeiro, homologábel ao Número de Identificación Fiscal (NIF) para unha persoa de nacionalidade española. Carecer de NIE pode provocar sancións da Policía, imposibilidade, nalgúns casos, para asinar contratos de traballo ou de aluguer de vivenda e, mesmo, dificultades para dar de alta a subministración eléctrica. A obtención do NIE require, ademais de ter recoñecida unha residencia legal no Estado español por un mínimo de seis meses, que a persoa emigrante acuda a unha comisaría ou oficina de estranxeiría para que lle tomen as pegadas dactilares, debendo voltar, posteriormente, para recoller a tarxeta e aboar as taxas correspondentes. Estes trámites requiren de cita previa, algo que resulta, practicamente, imposíbel de concretar para moitas persoas demandantes do citado número. "Non hai citas dispoñíbeis" Unha muller estranxeira traballa na Coruña, en réxime de residente, coidando maiores. A persoa, que desexa agochar o seu nome para evitar represalias, sinala a Nós Diario que “hai un mes obtiven a renovación para o permiso de residencia e, cando quixen solicitar cita para a renovación do NIE na Xefatura Superior da Policía da Coruña, cidade onde resido, resultoume imposíbel conseguilo tras numerosos intentos”. María, nome suposto desta traballadora emigrante do sector da dependencia, indica que "todos os intentos de conseguir a cita" rematan coa mesma mensaxe: "Neste momento non hai citas dispoñíbeis. En breve a Oficina porá á súa disposición novas citas". Na mesma liña, destaca “a imposibilidade de concretar data para realizar ese trámite, malia tentalo en máis de seis ocasións”. Denunciada unha empresa de Vigo por explotación laboral a migrantes Outra persoa coa mesma problemática, neste caso traballadora no sector da hostalaría, explica a Nós Diario “as múltiples tentativas para conseguir cita, todas eles infrutuosas”. Neste sentido, di que “moita da xente que conseguiu renovar o NIE foi mediante terceiras persoas que cobran polo servizo, xa que non é posíbel conseguir a cita por vía presencial e as prazas que sacan deben ser moi poucas”. 30 euros por cita Juana, nome suposto desta muller emigrante, comenta que “unhas coñecidas dixéronme que conseguir a cita previa para realizar os trámites viña custando 30 euros”. A este respecto, revela que “unha muller fai todas estas xestións por 30 euros”, sendo “moitas as emigrantes que acoden a ela para resolver este problema”. 'Un grupo mafioso' E. A. é un veciño da Coruña que ten colaborado de maneira altruísta con algúns emigrantes con problemas para conseguir o NIE. Neste sentido, aclara a Nós Diario que “as solicitudes de cita para estes trámites ábrense por internet todas as quintas feiras ás 11 da mañá pero resulta imposíbel conseguir algunha” e apunta que “hai un grupo mafioso que, descoñezo como, acapara a súa totalidade previo pagamento”. Activistas antirracistas denuncian as discriminacións por parte das institucións A documentación entregada por E. A. a este xornal confirma as diversas ocasións en que lle resultou imposíbel concertar a cita. Así, por exemplo, achega unha captura de pantalla tomada pasada a quinta feira onde “realizo o intento de solicitude ás 11.01 horas, é dicir, un segundo despois de que se abrise o 20 de abril o prazo de solicitudes de novas citas xa non existía ningunha cita dispoñíbel”. E. A. fixo chegar as súas queixas á Delegación do Goberno español na Galiza. Neste sentido, nun escrito rexistrado o 20 de abril denuncia que “vai facer un mes que pretendo conseguir cita na Xefatura de Policía da Coruña para que unha persoa inmigrante poida renovar a Tarxeta de Identidade de Estranxeiro caducada desde hai tempo. Todos os intentos, reiterados diariamente, resultan negativos”. Nós Diario púxose en contacto esta terza feira co servizo de prensa da Delegación do Goberno da Galiza co obxectivo de coñecer a opinión diante das queixas das persoas usuarias sobre o funcionamento da cita no departamento de Estranxeiría da Xefatura Superior da Policía da Coruña e as dúbidas sobre posíbeis irregularidades. Porén, o departamento de comunicación da Delegación non respondera ao fechamento desta edición. Thimbo Samb: "Non é fácil para min denunciar actitudes racistas con humor pero hai que seguir rompendo as barreiras" O mercado negro de citas ten a súa orixe no proceso de recortes no sector público. A diminución do número de persoal laboral e funcionario está provocando a desaparición da atención presencial en moitos servizos, así como unha redución na oferta de citas. A este respecto, fontes da Administración do Estado consultadas por Nós Diario sinalan que “o Goberno está en fase de centralizar todos os servizos do Estado relacionados coas citas previas en Zaragoza e encargarlle a súa xestión a unha empresa privada”. Ao tempo, organizacións políticas, como o BNG, veñen reclamando no Congreso español a recuperación da cita presencial para favorecer o acceso da cidadanía á Administración. A xestión das citas de estranxeiría xera queixas no conxunto do Estado Os problemas para conseguir cita previa en diversos organismos do Estado están a ser obxecto de diversas denuncias por parte das persoas usuarias. Precisamente, en relación co funcionamento dos servizos de Estranxeiría, veñen aparecendo nos últimos anos queixas en diversos puntos do Estado español, que mesmo deron pé á apertura dunha investigación da Fiscalía no País Valencià. A maiores, diversos colectivos, como a Asociación Avogados Estranxeiristas, teñen iniciado diversas accións xudiciais contra o denominado mercado negro de citas para emigrantes. Os anuncios de persoas ofrecéndose a emigrantes a cambio de diñeiro para realizar os trámites e fixar as citas previas necesarias para conseguir o Número de Identidade de Estranxeiro (NIE) son doadas de seguir. Neste sentido, son numerosas as ofertas en redes como Telegram, WhatsApp, Facebook ou incluso en portais como Milanuncios ou Wallapop, pero tamén nas propias rúas das cidades. O prezo das xestións varía en función do servizo e dos territorios, situándose a contía para concertar as citas previas no Estado entre 30 e 150 euros, sendo de 30 euros na Galiza segundo confirman as fontes consultadas. A sospeita paira sobre estes procedementos, porén o máis grave é o que sinala Juana (nome suposto dunha muller emigrante), quen considera “inadmisíbel” que “a compra de citas é a única alternativa para as persoas que temos que realizar este trámite”. Nesta liña, lamenta que “as autoridades non persigan con máis dureza estes feitos”.