O presidente da Xunta, Núñez Feixoo, ratificou esta quinta feira que en Galiza realizáronse 167 probas de laboratorio no marco do protocolo para combater o coronavirus. De todas elas, asegurou que hai cinco que quedan pendentes de resultados.
Fontes da Xunta consultadas por Europa Press aclararon que non é que os cinco casos estean pendentes de confirmar por parte do Centro Nacional de Microbioloxía de Majadahonda, pero que pode que se realizasen probas anteriores na Galiza e aínda non se sabe o resultado.
De feito, polo momento e despois da confirmación do primeiro caso en Galiza a pasada terza feira, Sanidade só recoñece que a mostra do transportista que permanece illado no Hospital Álvaro Cunqueiro de Vigo foi enviada a Majadahonda.
Feixoo garantiu que se informará "en tempo real" en canto haxa confirmacións oficiais, que -recordou- só pode dar o centro de Majadahonda. Así, resaltou que, dos 260 casos confirmados no Estado español, Galiza só conta un - o do paciente ingresado no Complexo Hospitalario Universitario da Coruña (CHUAC) -.
Tras abordar a situación no Consello da Xunta, especificou que, ata as 10.00 horas desta quinta feira, rexistráronse 1.393 chamadas de atención en relación ao virus, con 55 tomas de mostras domésticas e 45 traslados de pacientes a centros de saúde. .
