Folgas e folgas

Folga: Interrupción voluntaria e colectiva do traballo, realizada como medida de presión para obter melloras laborais ou doutro tipo (Real Academia Galega, RAG). O 20 de abril de 2023, a Mesa Sectorial e a Consellaría de Sanidade chegaron a acordos para todo o persoal traballador do sistema sanitario galego e conseguiuse, tras a ameaza de folga (de verdade) de todo o conxunto de profesionais que traballa no Sergas. Anteriormente, a Confederación Estatal de Sindicatos Médicos (CESM) convocou "folga indefinida" que durou nove días, e rematou con acordos económicos para o colectivo médico exclusivamente. De aquí o título deste artigo. Se non se conseguise o que se conseguiu na pasada Mesa Sectorial, asistiríamos a unha folga convocada para todo o persoal, que tería unhas consecuencias moitísimo máis dramáticas que as que provocou a deste sindicato irresponsable: anuláronse 1.223 cirurxías, 1.974 probas e 23.723 consultas. O prezo a pagar é demasiado alto para unha poboación que xa sofre unhas listas de agarda desproporcionadas e unha administración que non sabe (ou non quere) resolver os problemas sanitarios que afectan ao conxunto do territorio. A estratexia do Partido Popular é a do desmantelamento do sistema sanitario galego, para logo, co deterioro da asistencia, privatizalo, o que leva facendo dende 2009, que goberna na Galiza. A súa política de recortes levou a unha falta de profesionais evidente que ten reflexo nas consultas masificadas e nunhas e nuns profesionais da medicina e da enfermaría desmotivados e sobrecargados de traballo. Se a ameaza de folga dos cinco sindicatos da Mesa Sectorial (elixidos polos traballadores e traballadoras do Sergas, algo que non conseguiu o sindicato convocante desta folga) foi suficiente para facer sentar na mesa de negociación o conselleiro de Sanidade (o cuarto dende que goberna o Partido Popular), que non se conseguiría de facerse dita folga? Melloras laborais As melloras acadadas na Mesa Sectorial teñen a categoría de históricas, pois a redución de horario laboral, sen perda de poder adquisitivo, é algo histórico. A negociación para convocar as prazas que fan falta, sobre todo en Atención Primaria, é tamén relevante. Na ILP figuraba un novo modelo de Atención Primaria, cun orzamento axeitado e sen falta de profesionais As melloras son para todo o persoal. En cambio, outros intentan conseguir algo que é ilegal: equiparar a exclusividade dos que traballan só para o Sergas, cos que, a maiores, traballan tamén para a privada, único obxectivo deste sindicato minoritario e clasista. A continuidade nas xuntanzas da Mesa Sectorial poderá conseguir máis melloras laborais, que se verían reforzadas se no debate no Parlamento de Galicia, onte, se conseguise aprobar a Iniciativa Lexislativa Popular, presentada pola Plataforma SOS Sanidade Pública de Galicia e avalada por 47.000 firmas (precisábanse 10.000) e con máis de 50.000 persoas nas rúas de Compostela o pasado 12 de febreiro. Nesta ILP, que foi tombada cos votos do PP, figuraba un novo modelo de Atención Primaria para Galiza, cun orzamento axeitado (Rueda sempre dixo que non era un problema de "chequeira") e unha cantidade de traballadores e traballadoras que resolverían o problema fundamental do Sergas: a falta de profesionais. Tamén se conseguiría que se incorporasen aos centros de saúde profesionais da psicoloxía clínica, a fisioterapia, a logopedia... que darían pé a unha Atención Primaria integral. Salario base Por certo, o aumento no prezo da hora de garda que conseguiu a CESM é so para o persoal médico, e pasa en día laborable de presenza física, e a partir do 01 de xullo de 2023, a 27 euros/hora e, a partir do 1 de xaneiro de 2024, a 28 euros/hora; o prezo das gardas de presenza física domingos e festivos será de 30 euros/hora. Estes prezos por hora de traballo, dende logo, non están en relación coa responsabilidade e co esforzo para realizar esta actividade e son moitísimo menores que en calquera outro traballo sen tanta responsabilidade como o dunha médica ou médico. O dos sábados xa é de traca: 7 horas de traballo, de 8 a 15 horas, por 127 euros (ata o de agora non se paga): sae a hora a 18 euros, en sábado e coa responsabilidade de ter ao teu cargo miles de persoas dun lugar determinado, e que algunhas poden enfermar. Alguén se estraña das dificultades para encontrar profesionais para o sistema sanitario público na Galiza? O salario base dun médico ou médica segue sendo de 1.288,31 euros (ao que hai que sumar os complementos) pero o salario base é ese!