O Goberno estatal decreta a fin da máscara en exteriores e aumenta a capacidade nos eventos deportivos

O Consello de Ministras acordou na súa reunión desta terza feira eliminar, a partir da quinta feira, o uso das máscaras en espazos exteriores, e pon fin ao seu uso en recreos e patios de colexios, sempre que se poida respectar a distancia de seguridade e non haxa aglomeracións.

"Os nenos e as nenas españois deron un grande exemplo de responsabilidade durante todo este tempo, e sen dúbida isto será unha gran noticia tanto para eles como para os seus mestres e as súas mestras e tamén para os seus pais", sinalou na roda posterior ao consello a portavoz do Goberno e ministra de Política Territorial, Isabel Rodríguez.

A medida que entrará en vigor esta quinta feira, tras a súa publicación no Boletín Oficial do Estado (BOE), "foi posíbel grazas á responsabilidade de todas e todos no exercicio de vacinación e do coidado".

Con todo, engadiu, seguirán a ser obrigatorias no interior e tamén nos eventos organizados, aqueles que sexan ao ar libre —por exemplo, un concerto— e nos que non se poida garantir a distancia de seguridade de 1,5 metros.

Esta decisión tómase un día despois de que o Ministerio de Sanidade e as consellarías acordaran, nun pleno extraordinario do Consello Interterritorial de Saúde, a eliminación da obrigatoriedade do uso das máscaras no exterior, agás en aglomeracións e cando non se poida respectar a distancia de seguridade.

Capacidade en eventos deportivos

Aliás, aprobaron para entrar en vigor esta mesma quinta feira a medida de subir os límites de capacidade para as competicións deportivas da Liga Nacional de Fútbol Profesional e a liga da Asociación de Clubs de Baloncesto (ACB), así como doutros eventos deportivos multitudinarios.

Desta forma, pásase de 75% a 85% para eventos en recintos abertos, e até 75% para eventos en recintos fechados, onde antes a capacidade máxima era de 50%.