Unha tese de doutoramento -con sobresaliente 'cum laude'- de Sheila F. Riveiro, investigadora da Universidade de Santiago de Compostela (USC), apunta a que os incendios forestais facilitan o desprazamento de especies nativas dos montes da Galiza e Portugal.
Este estudo senta as bases para o control de especies exóticas invasoras nos ecosistemas. Aliás, o estudo identifica os factores chave que axudan ao asentamento de invasoras tras os fogos.
A investigación 'Basees ecolóxicas para ou control de especies exóticas invasoras en relación co fogo' sinala como os incendios son modeladores da paisaxe e "poden provocar cambios drásticos" nos ecosistemas, xa que provocan efectos como a entrada de especies exóticas.
Unha vez descrito no laboratorio o comportamento invasor destas especies e achado o método polo cal adquiren unha vantaxe competitiva sobre as nativas, a investigadora pertencente ao grupo de referencia competitiva Biodiversidade e Botánica Aplicada (Bioaplic), propón a través dun estudo de campo métodos de control para as principais invasoras da Galiza e Portugal, como as acacias, o eucalipto ou a albicia.
Control
Os métodos avaliados adáptanse ao contexto de fogos da Galiza e ás características das especies estudadas, entre o que destaca a necesidade de métodos de control a longo prazo que teñan como fin último a eliminación do banco de sementes das especies co fin de evitar a súa rexeneración.
Dirixida pola profesora da Facultade de Bioloxía Otilia Reyes, esta investigación contou co financiamento do programa de axudas á etapa predoutoral e encádrase nos proxectos Fireseves e Fogo e Invasoras.
