A Xunta da Galiza publicou a orde co novo protocolo para o uso dos teléfonos móbiles nos centros escolares sostidos con fondos públicos, que terá plena vixencia a partir da vindeira segunda feira, día 8 de xaneiro, coa volta ás aulas após a parada polas vacacións do Nadal.
De acordo con este texto, o emprego destes dispositivos estará vetado en todo momento durante a xornada escolar, incluídas as entradas e as saídas e as actividades extraescolares, mais os centros "poderán estabelecer excepcionalmente normas para a correcta utilización" como "ferramenta pedagóxica" e "supervisada polo propio profesorado".
Móbiles na escola
Ademais, o alumnado tamén poderá usar o móbil de modo "proporcionado e razoábel" en situacións de necesidade "médicas ou doutra índole", sempre e cando estea xustificado polas circunstancias e sexa autorizado pola dirección ou, de non ser posíbel, polo profesorado.
Ademais, os centros que imparten ensinos de FP de Grao Superior, de Réxime Especial (como escolas oficiais de idiomas ou conservatorios, entre outros) e de Adultos, polas súas características organizativas e de alumnado, poderán non aplicar esta medida nesas etapas se así o consideran.
Isto é o groso do contido do protocolo que ten unha extensión de catro páxinas e media e que figura como anexo dunha orde. Na súa exposición de motivos, enmarca as medidas na "mellora continua da convivencia escolar", unha liña "prioritaria" para a Consellaría de Educación.
Neste contexto, a Xunta non obvia o proceso de transformación dixital das escolas e que o uso do móbil forma parte "do día a día", tamén dos menores. Para ese efecto, o novo protocolo, que foi trasladado en semanas pasadas a directores, asociacións de pais e outros axentes implicados -con opinións algo diverxentes-, busca definir o que son as "boas prácticas educativas" no emprego da tecnoloxía.
Ademais, o texto ten en conta que, en base á normativa anterior, do ano 2015, había "numerosos centros" que xa tiñan nas súas normas de convivencia as súas propias restricións que se sumaban ás estabelecidas pola Consellaría con resultados "valorados como positivos por toda a comunidade educativa".
O presidente da Xunta da Galiza, Alfonso Rueda, anunciou o pasado 7 de decembro que o Goberno galego acordara estenderá a prohibición de usar o teléfono móbil en aulas a recreos, comedores e actividades extraescolares. 75% dos centros educativos galegos teñen vetado o uso de móbiles para o alumnado en todo momento, segundo os datos facilitados pola Xunta que, agora, pretende unificar o criterio e que a prohibición sexa xeneralizada. Desde diversos colectivos de Anpas posicionáranse contra a prohibición total dos móbiles nos centros de ensino. Así, o presidente da Confederación Galega de ANPA de Centros Públicos (Confapa), Rogelio Carballo, manifestara que se a prohibición supuña "unha irresponsabilidade" por dar "carta de natureza a criterios negacionistas".
