A presión hospitalaria mantén a tendencia descendente na Galiza con 59 ingresados menos con Covid-19 con respecto á xornada anterior ao situarse con 634 pacientes con coronavirus. Tamén volveron a reducirse os casos activos, que supoñen 7.292.
Así se reflicte nos datos actualizados pola Consellería de Sanidade con rexistros até as 18:00 horas desta terza feira, que inclúen 133 pacientes con Covid en UCI -13 menos- e 501 noutras unidades -46 menos-.
Os ingresados con coronavirus baixan en seis do sete áreas sanitarias, xa que soben lixeiramente na de Santiago e Barbanza, onde hai 18 en UCI -un menos- e 70 noutras unidades -cinco máis-.
Os casos activos manteñen, así mesmo, a tendencia descendente e sitúanse en 7.292 na Galiza, o que supón 456 menos que a xornada anterior. Xa están por baixo do milleiro en cinco do sete áreas: 983 na de Pontevedra e O Salnés; 807 na de Santiago e Barbanza; 767 na de Ferrol; 748 na de Lugo e 509 na de Ourense.
Por contra, seguen por riba desa cifra de mil casos activos de Covid-19 a área sanitaria de Vigo, con 1.127; e a da Coruña e Cee, que conta con 2.351.
En canto aos novos contaxios diarios detectados por calquera tipo de proba, aumentaron lixeiramente a 279, dos que 223 son positivos confirmados por PCR nas últimas 24 horas. Destes últimos, 58 corresponden á área da Coruña e Cee; 48 á de Vigo; 38 á de Santiago e Barbanza; 28 á de Pontevedra e O Salnés; 25 á de Lugo; 16 á de Ferrol e 10 á de Ourense.
Pola súa banda, a taxa de positividade -porcentaxe de infeccións por test PCR realizados- reduciuse a un 3,3% tras aumentar a 4,8% a xornada anterior, polo que segue por baixo do 5% que a Organización Mundial da Saúde (OMS) marca como máximo para dar por controlada a pandemia.
Desde o inicio da pandemia faleceron despois de ser diagnosticados con Covid-19 un total de 2.196 persoas, tras notificar na noite da terza feira Sanidade a morte doutro nove persoas, entre elas un home de 40 anos que presentaba patoloxías previas.
