Contas fiscalizou 2.500 millóns pagados pola Xunta á sanidade privada nos últimos dez anos

As axudas públicas á sanidade privada incrementáronse en 6% en 2021, aumentando 20% desde a chegada do PP ao Goberno galego en 2009. A Xunta da Galiza achegou no exercicio 2021 —o último fiscalizado polo Consello de Contas— un total de 211 millóns de euros á sanidade privada, correspondéndose 138 millóns de euros con concertos cos centros hospitalarios privados. Son datos recollidos no último informe de fiscalización do Sergas sobre a sanidade privada realizado polo Consello de Contas e que a finais da semana pasada este organismo entregou no Parlamento galego. O documento rexistra que gran parte dese diñeiro público que vai á sanidade privada diríxese aos concertos cos hospitais privados, que reciben 65% do total. A Xunta entrega 211 millóns á sanidade privada Acumulado A factura que anualmente paga a Xunta da Galiza á sanidade privada só en concepto de "uso de medios alleos" —desde derivacións de ingresos hospitalarios até realización de probas— supera os 200 millóns de euros. Entre 2011 e 2021 a cifra total abeira os 2.500 millóns de euros. Un repaso aos informes anuais de fiscalización sobre o Sergas que elabora o Consello de Con-tas, así como os propios orzamentos da Xunta da Galiza indican que ese pago á sanidade privada foi en aumento. A contía que desembolsa a Administración galega neste concepto varía entre os 224,5 millóns de euros en exercicios como 2021 e 2014 e os 203 millóns de 2017. O Goberno galego defende que este pagamento representa menos dese 6% do orzamento total sanitario que lles marca o Consello de Contas —móvese entre 4,5 e 5,5%—. O último exercicio fiscalizado por Contas é 2021. Mais unha análise da Fundación Instituto para o Desenvolvemento e Integración da Sanidade (IDIS) permite coñecer canto destina o Sergas á sanidade privada en 2023: 611.000 euros ao día; 223 millóns en todo o exercicio. A Xunta paga á sanidade privada 611.000 euros diarios As relacións entre os grupos sanitarios privados e a Xunta da Galiza levan anos no albo do Consello de Contas. A este respecto, no seu último informe, o organismo dirixido por José Antonio Redondo afirma que "o Sergas está a utilizar a autorización de uso temporal como unha forma ordinaria de contratación, de maneira directa, sen concorrencia, publicidade e igualdade de trato, de servizos sanitarios non concertados". Lamenta o Consello que, "ao obviarse a vía estabelecida na lexislación de contratos públicos", non existe expediente de contratación e, por tanto, "carécese de pregos que regulen a contratación, de oferta ou de contrato que estabeleza e ordene os dereitos e obrigas das partes". Modelo de contratación Estas advertencias do Consello de Contas ao Goberno galego sobre o seu modelo de contratación van acompañadas de "recomendacións" dirixidas a que poña fin ao mesmo. O Executivo presidido por Alfonso Rueda, porén, opta por facer ouvidos xordos a estes requirimentos. O pasado marzo, sen ir máis lonxe, o conselleiro maior do Consello de Contas, José Antonio Redondo, compareceu no Parlamento galego, onde recoñeceu que un ano máis continúa "pendente" de atender por parte da Xunta da Galiza a recomendación de que "o Sergas debe cesar na utilización da figura da autorización de uso como forma contractual e suxeitar ao marco legal os gastos que se veñen detectando pola vía do contrato menor e que non se axustan a regulación". Persoal do Hospital de Monforte mobilizarase contra o “desmantelamento” do centro O modelo de contratación aplicado polo Sergas ten sido obxecto de denuncias por parte do BNG e do PSdeG, que instaron en reiteradas ocasións a Xunta da Galiza a que a contratación menor [aqueles contratos que se adxudican directamente, sen concurso, para servizos ou subministros de menos de 15.000 euros] sexa "excepcional" e non "estrutural". "A dedo" O Sergas adxudicou no exercicio 2022 un total de 889 millóns de euros sen concurso nin publicidade, o que se coñece popularmente como "a dedo". Unha adxudicación que afecta unha cifra importante: oito de cada 10 euros do servizo galego de saúde destinados a contratación. O sistema elixido polo Sergas implica que asigna de maneira directa un contrato —o modelo popularmente coñecido como "a dedo"—, evitando a publicidade e mais os procedementos de concurso. O sistema de benestar galego, en mans privadas: só 20% das residencias e 40% dos centros de día son públicos As peticións en sede parlamentaria dos grupos da oposición para que se investigasen eses contratos do Sergas foron vetadas de maneira repetida polo Partido Popular. O propio Consello de Contas recrimina tamén ao Sergas a opacidade das súas contas e a dificultade de sometelas a un control financeiro: "continúa sen implantar un sistema integral de contabilidade tal e como esixe o Plan xeral de contabilidade pública da Galiza, limitándose a información rendida á de carácter administrativo-orzamentario, sen que se achegue o balance de situación nin a conta do resultado económico-patrimonial", conclúe o informe. "O cerebro do Sergas está controlado pola privada" "O Sergas externalizou os instrumentos necesarios para a planificación e xestión estratéxica do sistema: o de información (historia clínica electrónica, receita electrónica, teléfonos informativos e de cita previa), a loxística, a investigación, a docencia, a innovación, a investigación e o coñecemento (I+D+i). O resultado é que o cerebro do Sergas está controlado por empresas privadas, o que lles permite reorientar o sistema cara aos seus intereses". Son palabras de Manuel Martín, médico e portavoz da plataforma SOS Sanidade Pública, en conversa con Nós Diario. "78% das camas hospitalarias galegas son públicas e o 22% privadas. Os concertos coa sanidade pública supoñen 61,9% das súas ganancias [da privada]", prosegue o facultativo. Nesta liña, indica que "nestes últimos anos, os recortes de recursos, especialmente en Atención Primaria, e a subida exponencial das listas de espera fixeron que o gasto sanitario privado crecera de maneira importante até alcanzar o 25% do total. Unha parte cada vez maior da poboación contrata seguros privados ou acode a especialistas fóra da sanidade pública. O gasto privado na Galiza supón 25% do total. Dentro deste a compra de seguros privados supón o 20% e creceu un 10% desde o 2020".