Os concellos de Betanzos (As Mariñas) e Bergondo (comarca da Coruña) decretaron o fechamento de fontes ornamentais, a eliminación das regas como método de limpeza da vía pública e prohibiron o enchido de piscinas como medidas para facer fronte á situación de seca prolongada que afecta a zona das rías da Coruña e Ferrol.
En cadanseu bando municipal emitido este terza feira, 22 de agosto, as Alcaldías dos municipios ordenan unha serie de medidas para tratar de aforrar auga ante a escaseza que se atravesa a estas alturas do verán pola falta de choivas durante o ano.
Restrinxen e fechan o uso de fontes ornamentais, eliminan as regas de rúas para limpeza e prohiben o enchido de piscinas, ademais de instar a veciñanza a non lavar os seus vehículos.
No caso de Bergondo, avanzan que se acometerán medidas para controlar o consumo de auga en edificios e instalacións municipais, así como para detectar perdas na rede municipal.
Así, apelan á concienciación cidadá sobre o consumo de auga para evitar o seu gasto innecesario. "Regresaremos á normalidade se o réxime de choivas do comezo do outono e do inverno recuperan os niveis habituais para esas datas, pero tamén temos que ser quen de afrontar a prolongación deste estado excepcional de seca, de ser necesario", explicou a alcaldesa de Bergondo, Alejandra Pérez Márquez.
En Betanzos, que corta desde esta cuarta feira, 23 de agosto, a subministración de auga da traída municipal para as fontes ornamentais, manteranse "como algo excepcional" as festas infantís coa auga como protagonista programadas para esta xornada e a da quinta debido ás altas temperaturas que se rexistran.