As pasaxeiras e os pasaxeiros dos tres aeroportos galegos medraron en agosto en comparación co mesmo mes de 2022, con especial mención á cifra récord mensual en Compostela, con 402.745 viaxeiros, 7,2% máis que un ano antes.
Segundo os datos publicados esta terza feira, 12 de setembro, por Aena, do total de agosto no aeroporto Rosalía de Castro, 401.233 persoas viaxeiras foron de voos comerciais, que se reparten: 293.248 en voos estatais e 107.985 fóra do Estado español.
No que vai de ano, pola terminal compostelá pasaron 2.408.263 pasaxeiras, 13,5% máis que nos oito primeiros meses de 2022. Isto tradúcese tamén nun aumento das operacións, con 17.604 movementos de aterraxe e despegue, 4% máis. A carga transportada rexistra 3.182 toneladas nos últimos oito meses.
A Coruña e Vigo
Pola súa parte, o aeroporto da Coruña computa 110.019 pasaxeiras e pasaxeiros en agosto, 15% máis que no mesmo mes do ano pasado. O número de operacións estes mes ascendeu a 1.432, das cales 777 foron voos comerciais, isto implica un aumento de 4,3%.
Na suma dos oito primeiros meses de 2023, Alvedro conta con 826.914 pasaxeiros, 42,6% máis que nos oito primeiros meses de 2022. Houbo 10.485 movementos, 12,7% máis. A carga transportada rozou as 50 toneladas, unha recuperación de 87% fronte ao mesmo período de 2022.
No tocante a Vigo, houbo 116.292 pasaxeiros e pasaxeiras en agosto, 1,8% máis que un ano antes. O número total de operacións foi de 1.581, 1,5% máis, con 964 voos comerciais.
Peinador acumula 759.863 viaxeiros e viaxeiras entre xaneiro e agosto, o que supón unha alza de 27,7% respecto aos oito primeiros meses de 2022. Alcanzáronse 9.986 movementos de aterraxe e despegue, un incremento de 10%. A carga transportada superou as 443 toneladas nese período.
