A Fiscalía Xeral do Estado (FXE) recibiu xa tres denuncias contra o presidente da Real Federación Española de Fútbol (RFEF), Luis Rubiales, polo bico forzado na boca que deu á xogadora Jenni Fermoso na entrega de medallas do Mundial en Australia.
Fontes fiscais confirmaron que o Ministerio Público conta xa con tres denuncias sobre a mesa presentadas por tres particulares que piden que se investigue Rubiales, quen acumula frontes abertas no Consello Superior de Deportes e o reproche público de varias formacións políticas, así como da propia Hermoso, que a noite da cuarta feira emitiu un comunicado no que pedía "medidas exemplares" para o presidente da RFEF.
As mesmas fontes precisaron que unha das denuncias foi presentada polo presidente da Escola de Adestradores de Fútbol en España (Cenafe), Miguel Ángel Galán, quen o ano pasado presentou unha querela contra Rubiales que se investiga no Xulgado de Instrución Número 4 de Maxadahonda por presuntas irregularidades na RFEF para que o torneo da Supercopa de España se xogase en Arabia Saudita.
Até o momento, ningunha das tres denuncias interpostas ante a Fiscalía Xeral do Estado foron admitidas a trámite.
Viaxe a Nova York
Para alén diso, A xuíza de Maxadahonda que investiga estas presuntas irregularidades cometidas no seo da RFEF pediu información sobre unha viaxe que Luis Rubiales, realizou a Nova York (EUA) en 2018.
Nunha providencia do 14 de xullo a xuíza Delia Rodrigo Díaz solicitou a petición da Fiscalía que se acheguen á causa “os documentos xustificativos de dita viaxe”.
![Zona queimada por un incendio en Crecente (A Paradanta). [Imaxe: Adrián Irago / Europa Press]](/asset/zoomcrop,480,270,center,center/media/nosdiario/images/2024/05/01/2024050121174923623.jpg)
