No Pladiga, o plano de prevención e extinción de incendios da Xunta, contemplábase como obxectivo que só ardesen 15.000 hectáreas en todo o curso. Pois ben, só nesta fin de semana -e co dispositivo anti-incendios desmantelado segundo denunciou a oposición- arderon no país, en 80 incendios, por volta de 4.000 hectáreas, isto é, 26 por cento das previstas na planificación do goberno galego.
O país sofreu un total de 80 incendios desde o sábado, 25 deles declarados apartir das 12 horas deste domingo. 9 dos lumes son situación alerta 2, isto é, poñen en risco as populacións, as persoas e as súas moradas. Producíronse nos concellos de Baiona, Ponteareas, Cervantes (no cerne de Os Ancares), As Neves, Gondomar, Salvaterra de Miño, Baños de Molgas e Chandrexa de Queixa. Mais tamén en parroquias do rural de Vigo tiveron de ser desaloxadas casas perante a cercanía das lapas.
Os incendios obrigaron tamén a cortar a circulación na A-52 e na AG-57, co tráfico colapsado e as chamas moi perto dos automóbeis, boa proba de que en moitas vías do país non se respeitan as franxas de protección, isto é, as zonas adxacentes ás estradas en que non se poden plantar árbores.
#ArdeGaliza #ArdeGalicia Coruxo, Vigo pic.twitter.com/qwKV6QmOEV
— Almu (@Bretsab) 15 de outubro de 2017