Polo ou capón de Fin de Ano, ese é prato escollido por José Ramón Gómez Besteiro, o candidato á Presidencia da Xunta da Galiza polo PSdeG nas elección do 18 de febreiro, para a cesa desta Noitevella que pon fin ao ano 2023.
Cunha receita de @robinfood, quero homenaxear a todas e todos os que vos toca cociñar nas festas familiares, coma a de hoxe.
— Gómez Besteiro (@jrgomezbesteiro) December 31, 2023
A min sempre me toca!😉
Comparto receita: Polo do Día de Fin de Ano.
Grazas aos meus fillos por facer de reporteiros.
Bo proveito, bo 2024! pic.twitter.com/Kj9YRyzlIj
Coa colaboración dos seus fillos nas cámaras, non dubidou en explicarlle aos galegos e ás galegas a través das súas redes sociais como se prepara a receita que levan tres ou catro anos degustando na súa casa o 31 de decembro.
“Cunha receita de Robin Food (cociñeiro vasco), quero homenaxear a todas e todos os que vos toca cociñar nas festas familiares, coma a de hoxe”, afirmou o socialista. “A min sempre me toca”, apostilou o candidato do PSdeG destacando as súas dotes de cociñeiro.
Un prato moi sinxelo de preparar, segundo Besteiro, mais que aínda así, require de horas de antelación para que poida chegar á mesa, posto que o polo ou capón debe estar 10 horas collendo sabor antes de continuar co resto das preparacións.
Ademais de diversas verduras, o caldo ou a mazá raiada, o “ingrediente segredo” da receita de Besteiro para a cea de Fin de Ano é o chocolate negro, nunha atrevida combinación co polo ou capón, mais que segundo o candidato socialista, deixa con moi bo sabor de boca.
O toque doce para un prato salgado, outro dos ingredientes curiosos da aposta culinaria do líder do PSdeG, vén da man do mel, especificamente do Valadouro, que engadiu cando o caldo comezaba a facer o ‘chup-chup’, xusto antes que o chocolate negro.
“Este si que non é de aquí, o chocolate negro, todo o resto é noso”, concluíu Besteiro, que quixo con esta receita pór en valor os produtos galegos para desfrutar na cea de Fin de Ano. Así, converténdose en cociñeiro nas redes sociais, despediu o ano o candidato socialista á Presidencia da Xunta.
