Radio Televisión Española (RTVE) ofreceu un debate no marco das eleccións galegas do 18 de febreiro de 2024 aos partidos con representación no Parlamento da Galiza -PP, BNG e PSdeG- para o próximo 14 de febreiro.
Este debate emitiríase en 'prime time', na desconexión da ‘1’ na Galiza e para o Estado español na canle ‘24 horas’, Radio 5, RTVE.es e RTVE Play. Así mesmo, RTVE facilitaría o sinal do debate a todos os medios que o soliciten.
"Consciente" da importancia desta cita e da súa misión de servizo público, Radiotelevisión Española ofreceu aos partidos políticos a organización dun debate electoral, cunha participación referida aos candidatos e candidatas das forzas políticas que contan con representación no Parlamento galego.
A oferta
A oferta suporía a realización e emisión en directo do debate e formaría parte da cobertura que RTVE prepara para a campaña electoral das eleccións galegas 2024, na cal, asegura “volverá apostar por unha información independente e plural", explica a compañía.
Pontón e Besteiro confirman
Tanto Pontón como Besteiro confirmaron a súa intención de asistir ao debate, aínda que é previsíbel que tamén a CRTVG planifique un encontro deste tipo, polo que é de esperar que a concreción de todas as datas se coñeza máis adiante.
Así, a líder nacionalista compartiu unha mensaxe na rede social X na cal mostrou a súa disposición para participar en debates. "Estarei encantada de debater sobre propostas e ideas para construír unha Galiza mellor. Espero que os outros candidatos pensen o mesmo", expresou, na mesma liña que xa indicou en días pasados a preguntas dos medios, nas cales lembrou que o BNG propuxo fixar por lei dous debates obrigatorios nas campañas (proposta que non entrou a trámite polo voto en contra do PP).
Pola súa parte, o candidato socialista remitiu oficialmente xa unha resposta a RTVE, e na que, ademais de mostrar o seu agradecemento polo convite, subliña a súa "dispoñibilidade" para debater e apunta que, por iso, propuxo "seis debates" xa que "os galegos merecen escoitar" as propostas dos partidos e "poder contrastar as ideas e programas dos diferentes candidatos".
"Considero, sen dúbida, que non hai mellor espazo para iso que un medio público que de forma independente e plural nos brinda esta posibilidade", apunta, para confirmar, a continuación, a súa "participación", quedando á espera de "acordar os termos concretos".