A ministra española de Sanidade, Mónica García, apelou esta sexta feira á necesidade de que haxa un "cambio de paradigma" no modelo de atención sanitaria na Galiza, e subliñou que son necesarios Gobernos "que crean na súa sanidade" e que "coiden os seus e as súas profesionais".
Así o trasladou, en declaracións aos medios, antes de participar nun acto con colectivos sanitarios, en compañía da aspirante de Sumar á presidencia da Xunta da Galiza, Marta Lois, e do candidato número 1 por Pontevedra, Ramón Sarmiento, entre outros.
A ministra reiterou a mensaxe de que "se entra Sumar, sae o PP, sae Rueda" da Xunta, e advertiu de que "hai quen quere" que as eleccións galegas do 18 de febreiro sexan "unha especie de segunda rolda, de segunda volta do que non puido ser o 23 de xullo". "Non, estas eleccións van das galegas, da súa sanidade, da súa vida, o seu benestar", puntualizou.
Nese sentido, subliñou que as eleccións galegas "van de ter máis ou menos pediatras, de esperar 8 meses ou unhas semanas, de ter cita en Atención Primaria en dous días ou dúas semanas". Respecto diso, reivindicou que o obxectivo de Sumar é, tamén na Galiza, "mellorar a vida da xente".
Mónica García recalcou que o Ministerio de Sanidade traballa para fortalecer esa Atención Primaria, para reforzar a atención á saúde mental e para que o sistema estatal de saúde "volva ser o orgullo, a xoia da coroa do Estado de Benestar".
Xiro de 180 graos tras anos de "malos tratos"
Pola súa banda, a candidata á Presidencia da Xunta, Marta Lois, apostou por dar "un xiro de 180 graos" á sanidade pública galega, tras 14 anos de "malos tratos e desmantelamento" por parte, primeiro de Feixoo, e logo do "presidente non electo" Alfonso Rueda.
A candidata repetiu a aposta de Sumar por "políticas útiles, que melloren a vida da xente" e incidiu en que, se os galegos e as galegas votan o 18-F igual que o fixeron o pasado 23 de xullo, haberá "un cambio histórico". Por iso, insistiu en que a súa formación terá un "rol decisivo" para que Rueda "salga da Xunta".
