Sánchez eríxese en "muro de contención" contra a dereita "que branquea" Vox entre acusacións de "ilexítimo" e "golpista"

No Estado español existen unhas “forzas progresistas que están dispostas a seguir avanzando e a non dar un paso atrás”, reiterou hoxe o presidente en funcións e candidato á reelección, Pedro Sánchez (PSOE), na primeira xornada da sesión de investidura no Congreso, que levará de forma previsíbel á súa escolla mañá por maioría absoluta. Sánchez fixo énfase en que “votar nas eleccións” é o tipo “superior de exercicio democrático”, perante as acusacións de Partido Popular (PP) e a ultraespañolista Vox de que é un presidente ilexítimo, todo isto no medio de manifestacións continuadas contra a sede do PSOE e da ofensiva destas formacións e do sistema xudicial español contra a investidura de Sánchez e o Proxecto de lei orgánica de amnistía, exixido polas forzas nacionalistas de Catalunya para apoiar a súa investidura, algo chave, canda o voto favorábel dos nacionalistas galegos e vascos, para que o PSOE poida formar un Goberno de coalición con Sumar como parte minoritaria. No marco desta campaña, o Tribunal Supremo rexeitou poucas horas antes do comezo da sesión a suspensión do debate, o que reclamaba unha querela de Vox, e a Audiencia Nacional subscribiu un comunicado anterior da corte no que reclamaba “respecto” á división de poderes pola inclusión na amnistía do lawfare, días despois de que un maxistrado vinculado ao PP intentara cunha manobra legal impedir que Carles Puigdemont, ex presidente catalán, entrara na amnistía. Na súa intervención, o candidato pediu un “alto o fogo inmediato” na Faixa de Gaza mais sen condenar a agresión israelí, e comprometeuse a traballar para o recoñecemento do Estado de Palestina, unha promesa que xa efectuara antes de acceder á Presidencia en 2018. Tamén defendeu o apoio de Madrid a Ucraína e presentouse como o “muro de contención” contra a “dereita irresponsábel que branquea e lexitima a ultradereita”. Sánchez deixa en evidencia con datos a xestión de Feixoo na Xunta: "Nin moderado, nin experto, nin bo xestor" Amais de debullar as distintas medidas pactadas nos acordos de investidura e lexislatura con outras formacións, entre elas a amnistía, xustificándose en que “as circunstancias son as que son”, insistiu en que no seu Executivo as persoas con máis recursos económicos “van pagar máis que o resto”, e anunciou que até xuño de 2024 o Imposto sobre o Valor Engadido nos alimentos de primeira necesidade ficará en 0%. No que atinxe ao transporte público, subliñou que será gratuíto desde o 1 de xaneiro para persoas desempregadas, novas ou crianzas, e asegurou que desenvolveran unha lexislación para fixar en 30 días o tempo máximo para recibir as axudas á dependencia, en paralelo a un aumento do bono para alugueiro de persoas de menos de 35 anos, que iría acompañado da habilitación de 183.000 vivendas públicas. Ao respecto dos abusos sexuais no ámbito da Igrexa católica, incidiu en que impulsarán modificacións legais para que estes delitos “non prescriban” e sinalou que se creará un fondo público para o pago de axudas e compensacións ás vítimas, após pór condicións os relixiosos para asumir a responsabilidade económica dos feitos. Á vez, avanzou que proporá un pacto de Estado na defensa dos dereitos da comunidade LGBT, marcar por lei en 60% do salario medio o salario mínimo interprofesional e reducir a xornada laboral a 37,5 horas semanais. VÍDEO | O PP xustifica o "Hijo de puta" de Ayuso a Sánchez após defender que dixera "Me gusta la fruta" Á hora da súa rolda, o líder do PP, Alberto Núñez Feixoo, mantivo que a investidura “nace dunha fraude” que “non se votou nas urnas” e que constitúe un “exercicio de corrupción política”, ao comprar os apoios con “cheques”, antes de acusar Sánchez de “ignorar as vítimas do separatismo” e de reclamar novas eleccións. Ao tempo, fixo fincapé en que a amnistía “destrúe” a convivencia. Nese sentido, Sánchez replicou que foron os Executivos do PP, con Mariano Raxoi como presidente, os que azuaron os choques entre o Estado e Catalunya mentres aplicaban recortes sociais, e salientou que “ninguén fixo máis por Vox que vostede á fronte do PP”, co que goberna en cinco territorios e 135 concellos, así como denunciou que os conservadores asumiron a narrativa ultraespañolista, rexeitando o quecemento global ou a loita pola igualdade. En alusión ao seu paso polo Goberno galego, o mandatario en funcións negou que Feixoo sexa moderado ou bo xestor, citando o aumento de 226% na débeda pública ou a fusión das caixas. Palestina, amnistía, condonación da débeda, vivenda, "pleno emprego"... estas son as principais promesas de Pedro Sánchez Hitler e Sánchez Na súa quenda, o presidente de Vox, Santiago Abascal, aseverou que a investidura é un “golpe de Estado”, e, de forma paradoxal, chegou a comparar Sánchez con Adolf Hitler, ditador de ultradereita de Alemaña na Segunda Guerra Mundial, que chegou ao poder “mediante unhas eleccións”, e até o considerou mellor que Sánchez posto que adiantou que quería acabar coa República de Weimar. 40 millóns de civís e 20 millóns de soldados, a maioría da Unión Soviética, morreron na loita contra o nazismo. Durante a súa intervención foi interrompido pola presidenta da Cámara Baixa, Francina Armengol, que lle exixiu retirar a expresión “golpe de Estado”, indicando que o Estado “sabe o que é unha ditadura e un golpe de Estado”, en ambos os dous casos de extrema dereita, algo ao que Abascal se negou, procedendo despois o seu grupo parlamentario a abandonar o Hemiciclo. Sumar trata de diferenciarse do PSOE entre leas internas A vicepresidenta segunda en funcións e líder de Sumar, Yolanda Díaz, detallou que “seguirán a traballar” para convencer o PSOE de aceptar as súas reclamacións en asuntos como a desigualdade, no que solicitou unha prestación por filla ou fillo de 200 euros até os 18 anos, ou vivenda, cuestionando que se desgraven 15% as compras. De "Poemas Galegos" e o Picasso catalán a unha falsa cita de Machado: os tropezos de Feixoo Antes, a titular de Igualdade en funcións, Irene Montero, de Podemos, formación integrada en Sumar, dirixiuse nunha comparecencia a Díaz e Sánchez sinalando que “botar Podemos” do Executivo dificultará “frear a ofensiva reaccionaria”. O voceiro da primeira forza nacionalista en intervir, Gabriel Rufián, de Esquerra Republicana de Catalunya, inculpou a dereita e a ultradereita por alertar de que "España rompe" desde a fin da ditadura franquista, e só porque teñen "moi mal perder" nas eleccións. Voto favorábel do BNG Mañá é a quenda do deputado do Bloque Nacionalista Galego, Néstor Rego, que anunciou previamente o voto favorábel da forza nacionalista á investidura de Sánchez tras un acordo co PSOE no que se garante o mesmo status para a Galiza que Catalunya ou Euskadi, o desenvolvemento dun sistema ferroviario de proximidade antes da fin da lexislatura ou unha nova rebaixa das peaxes ás persoas usuarias da AP9 e a AP53.