Como aconteceu no fracasado intento de investidura de Alberto Núñez Feixoo, do Partido Popular (PP), malia que daquela non estaba claro que se chegase a producir un acordo entre o PSOE e as forzas catalás, que exixían a amnistía para apoiar a reelección de Pedro Sánchez (PSOE) como presidente no Congreso español, todo indica que na sesión de investidura que comeza esta cuarta feira, xa con Sánchez como candidato, a amnistía volverá ser o eixo central do debate, que de forma previsíbel rematará nas votacións da quinta feira coa elección de Sánchez para un novo mandato co apoio de Sumar e as forzas nacionalistas de Catalunya, Euskadi e a Galiza, así como Coalición Canaria (CC), tras asinar distintos acordos de investidura ou lexislatura.
A sesión chega no marco dunha ofensiva dos conservadores e da ultradereita, co apoio do sistema xudicial español, contra o Proxecto de lei orgánica de amnistía, rexistrado a segunda feira na Cámara Baixa, e cuxa aprobación definitiva levará meses. Tanto PP como a ultraespañolista Vox buscan desde suspender a investidura até imposibilitar que a lei, que beneficiará as persoas independentistas catalás represaliadas polo Estado español e que tamén incluirá os policías denunciados por actos de violencia para evitar o referendo de autodeterminación do 1 de outubro de 2017 en Catalunya, chegue a ser promulgada.
| 19:55 |
Quenda agora de Gabriel Rufián, de ERC, que se dirixe á dereita: "Levan 46 anos dicindo que España está rota. Neste tempo o único que se rompeu son os discos duros de Bárcenas 35 veces e a dereita española dúas veces". Tamén afirma que "o único que une" todas as formacións que votarán 'si' a Sánchez é a súa "vontade de frear PP e Vox".  |
| 19:40 |
Pedro Sánchez agradece o apoio de Sumar: "Non podo estar máis de acordo co que dixo da política útil e a política sen insultos. Hai partidos que insultan e faltan á verdade, e partidos que poderemos discrepar deles; pero facémolo desde o respecto. Non todos os partidos son iguais. Véxoo en vostede", dixo, dirixíndose a Yolanda Díaz. |
| 18:50 |
Yolanda Díaz reivindica o seu proxecto de coalición co PSOE e afea a corrupción do PP: "Demostráronnos aos españois que só coñecen unha forma de Goberno, que se chama corrupción. A corrupción do PP custoulle aos españois nin máis nin menos que 60.00 millóns de euros. Iso si que rompe España, señor Feixoo".  |
| 18:30 |
Os deputados de Vox abandonan o Congreso para impedir a réplica de Pedro Sánchez entre acusacións de "golpe de Estado". |
| 18:10 |
Hijo de puta" ou "Me gusta la fruta"? Que lle dixo Isabel Díaz Ayuso a Pedro Sánchez nun momento captado polas cámaras?  |
| 17:50 |
O líder do ultradereitista Vox, Santiago Abascal, acusa Sánchez de dar un golpe de Estado: "Hitler tamén chegou ao poder mediante unhas eleccións, señor Sánchez, e só despois manobrou para liquidar a democracia. Como o chamou vostede na súa réplica ao señor Feixoo? A ditadura dos votos, verdade? Pois coa ditadura dos votos chegaron ao poder moitos dos peores tiranos e criminais da historia". |
| 17:10 |
Pedro Sánchez critica os pactos do PP con Vox: "Da violencia de xénero díxonos que non merecía a pena mencionala nos seus pactos con Vox porque era ‘unha obviedade’. O mesmo pasou co cambio climático. Na súa sesión de investidura dixo ‘non vou perder un só segundo en debater sobre o cambio climático’. A súa falta de empatía coas xeracións que virán paréceme moi preocupante".  |
| 16:40 |
Feixoo atribúe erroneamente unha cita a Antonio Machado... que resultou ser de Ismael Serrano: "Hoxe é sempre aínda, toda a vida é agora. E agora, agora é o momento de cumprir as promesas que nos fixemos. Porque onte non o fixemos, porque mañá é tarde. Agora". |
| 16:10 |
Feixoo, a Sánchez: "Veu presentarse como mal menor, vaia mérito. Vostede é o mal maior. Vostede é o problema coa súa falta de palabra, a súa ausencia de restricións morais, a súa patolóxica ambición. España mentres siga estará condenada á división, ese é o seu legado. Da súa Presidencia quedará o legado de Puigdemont chegando a España. A vostede a historia non o amnistiará. Prométollo". |
| 15:50 |
Quenda do líder do PP, Alberto Núñez Feixoo, que afirma que a investidura nace "dunha fraude". "Hoxe non acaba nada. Este non é o grolo final. Non hai límites nin os haberá para satisfacer a ambición persoal do candidato Sánchez. Non hai límites éticos, porque non ten reparos en recorrer á mentira sempre que lle beneficie; non hai límites políticos, porque o fin xustifica calquera medio e socio; e non hai nin tan sequera límites legais, porque se a lei entorpece os seus propósitos, adecúase aos intereses persoais de si mesmo ou dos seus socios", dixo. |
|
13:45 |
Suspéndese a sesión até as 15:30 horas |
| 13:37 |
O presidente do Goberno en funcións comprometeuse no debate de investidura a “facilitar a conciliación” de pais e nais ampliando o permiso por nacemento das 16 semanas actuais ás 20. |
| 13:30 |
Pedro Sánchez: "No nome de España, no interese de España, en defensa da concordia entre españois, vou conceder unha amnistía ás persoas procesadas polo procès catalán" |
| 13:20 |
"Os delitos de agresión e abusos a menores non prescribirá. Crearemos un fondo estatal para o pago de axudas ás vítimas, e instaremos á Igrexa católica para recoñecer as vítimas destes abusos por parte do clero. Imos reforar o labor dos centros educativos para asegurar a formación da educación sexual". |
| 13:10 |
Pedro Sánchez: "Os ricos terán que pagar máis que o resto". "Imos acabar coas vías de evasión fiscal das grandes fortunas. Mentres gobernemos, van pagar máis que o resto, porque o que di a constitución é que contribúa máis quen máis ten, e así ten que ser". |
| 13:00 |
O presidente do Goberno en funcións comprometeuse para levar a cabo un gran pacto de Estado de Saúde Mental que aumentará o número de psicólogos e psiquiatras no Sistema Nacional de Saúde (SNS). "Imos reducir os tempos de espera e a garantir que en España non haxa un só cidadán que necesite axuda psicolóxica e non poida obtela", afirmou durante a súa primeira intervención no debate de investidura no Congreso dos Deputados. |
| 12:56 |
O candidato anuncia medidas dirixidas a baixar a inflación, como baixar o IVE de alimentos até xuño de 2024, e a partir do 1 de xaneiro o transporte público será gratuíto para os menores, a mocidade e para os desempregados. Tamén se vai elevar o limiar de renda media, dos 30.000 euros actuais aos 38.000. |
| 12:40 |
Primeiros apupos desde a bancada da dereita: “Eliminaron os carrís bici, suspenderon licenzas fotovoltaicas...” comezou Sánchez desde a tribuna, antes de ser interrompido polos comentarios por parte da bancada da dereita, molesta coas súas declaracións. |
| 12:27 |
Sánchez critica a extrema dereita e a dereita que pacta con ela. "Cando se cuestiona o feminismo, cuéstionanse causas sobre dereitos humanos. Propostas reaccionarias contra a ciencia, cambio climático, cultura e que atacan ao diferente. Parasitan a dereita tradicional", engadiu. "O PP bendeciu a ultradereita dándolle 5 gobernos autonómicos con carteiras non menos importantes. Deulle a potestade de afectar a vida de 12 millóns de españois, e permitiulles expandir o seu discurso de odio". |
| 12:17 |
O candidato a presidente céntrase agora na política económica e social, e nos compromisos pendentes en Europa. "Mellorar o estado do benestar e non facer todo o contrario como avogan os neoliberais de arriba", sinala |
| 12:13 |
O presidente en funcións e secretario xeral do PSOE, Pedro Sánchez, comezou o seu discurso expresando o seu “respecto” ás persoas que se manifestaron nos últimos días nas rúas contra a lei de amnistía e os pactos cos independentistas: “É unha das formas de defender a nosa democracia que recoñece a nosa constitución”. |
| 12:01 |
Decenas de persoas protestan contra a investidura nas inmediacións do Congreso convocados por diferentes colectivos e plataformas de ultradereita. Hai despregados 1.600 axentes da Policía. |
|
12h |
Arrinca o debate de investidura de Pedro Sánchez |
